Pina: Lei do Suku Foun Fo Vantagen Bo’ot Ba Feto

Diretora Fundasaun Patria, Laura Pina sente kontente ho lei do suku foun ne’ebe Parlamentu Nasional aprova, tanba fo vantagen bo’ot ba partisipasaun feto iha prosesu kandidatura.

Tanba tuir nia, iha artigu 44 no 65 lei do suku foun ne’e, hatuur katak kada suku no aldeias obrigatorio tenke iha kandidatu feto, ne’e oportunidade diak ba feto sira atu kandidata aan. 

“Lei foun ne’e iha vantagen diak tebes ba partisipasaun feto no promove igualidade jeneru iha nivel sukus,” Pina hateten, iha salaun The Asia Foundation, hafoin partisipa Gender Working Group Meeting, iha Bebonuk, Dili.  

Tanba ne’e, nia hateten, ira sei servisu hamutuk ho governu no parseirus dezenvolvimentu sira hodi haforsa liu tan feto nia partisipasaun liu husi kapasitasaun, tanba lei garantia feto nia prezensa. 

“Ami sei kontinua fo prioridade ba reforsa kapasidade feto nian sai lideransa ne’ebe forte iha hanoin no asaun hodi kontribui ba dezenvolvimentu sukus,” nia dehan.  

Tuir lei, nia esplika, komunidade sei halo votasaun direita ba xefe sukus, xefe aldeias no delegada sira iha asembleia sukus, tanba ne’e votasaun sei mai ho bulletin tolu. 

Enkuantu reprezentante joventude no lia nain, nia dehan sei hili direita husi konselho do suku ne’ebe eleitu. 

Nia mos husu ba Comisaun Nasional ba Eleisaun (CNE) no Sekretariadu Tekniku Administrasaun Estatal (STAE) atu hala’o edukasaun sivika no votante ba komunidade sira, liu –liu feto atu sira bele komprende prosesu eleisaun ne’ebe sei mai. 

Iha tinan 2015,Komisaun A Parlamentar (konstituisaun, justisa, administrasaun publiku, poder lokal e anti korupsaun) deside halo revizaun ba lei numeru 3/2009 kona ba lideransa komunitaria, tanba la efetivu ona. 

No iha dia 24 nia laran projeitu lei ne’e hetan aprovasaun final global husi membru parlamentu sira no agora hein promulgasaun husi presidente da republika. 

Iha parte seluk Prezidente Asosiasaun Feto Munisipio Manatuto, Clara de Carvalho Ximenes, hateten sira iha ona lista kandidatu feto husi sukus maibe lei seidauk los.

“Tanba ne’e labele aprezenta lai ba Comisaun Nasional ba Eleisaun,” nia hateten.

Ohin loron, nia hatetn, feto la sai diskriminadu e feto sira hahu loke aan ona hodi partisipa iha area hotu.

Nia hatutan, asosiasaun sei halo aprosimasaun nafatin ba feto sira atu kandidata aan no husu mane sira atu apoiu feto sira tanba lei fo dalan.