- Publika iha: 26 Setembro 2016
Instituisaun Polisia Nasional Timor-Leste (PNTL) sei demiti oknum polisia ne’ebe tiru kanek membru Forsa Defeza Timor-Leste iha munisipiu Ainaro foin lalais ne’e.
Komando Polisia Nasional Timor –Leste (PNTL), Komisariu Julio da Costa Hornai hateten instituisaun la merese atu mantein ema ho atitudade hanesan ne’e, tanba krimi ne’ebe oknum komete ne’e grave.
“Instituisaun sei la lakon buat ida wainhira hasai nia membrus ne’ebe involve iha kazu grave sira hanesan ne’e,” Komisariu Hornai hateten, iha Fatuhada, Dili.
Nia afirma, instituisaun seguransa la’os atu halo violasaun ou turturasaun hanesan ema vandalismu, maibe atu servi povu no nasaun.
Enkuantu suspeitu ba kazu ne’e rasik, nia dehan agora dadaun hetan ona detensaun preventive, katak agora oknum ne’e dezarmadu no la uza farda ona inklui hases nia hosi servisu hotu-hotu, hodi atende nia prosesu iha tribunal.
Nia konta, kazu ne’e akontese iha munisipiu Ainaro, Sexta-feira (26/08/2016) maiz u menus tuku sia kalan wainhira membru nain rua ne’e partisipa hela iha festa, ba membru ne’ebe hetan kanek agora halo hela tratamentu iha ospital.
No liu husi oportunidade ida ne’e, Komisariu Hornai husu deskulpa ba Intituisaun Falentil-Forsa Defeza Timor – Leste (F-FDTL) inklui ba familia vitima no promote sei fo sansaun ne’ebe mais forte ba suspeitu ne’e.
Vise Komandante Jeral F-FDTL Brigadeiru Jeneral Filomino Paixao, husu atu instituisaun rua (PNTL-FFDTL) presiza tuur hamutuk tau hamutuk idea, hodi bele fo tipu disiplina ne’ebe forte ba soldadu no ajente sira atu asaun sira hanesan ne’e la bele akontese tan iha futuru.
Alende ne’e, nia mos sujere atu halo analisis SWOT hodi haree nia frakeza no dezafiu saida mak iha hodi akontese attitude sira hanesan ne’e.
“Husi ida ne’e ita bele nia problema ne’e iha ne’ebe, hodi ita bele identifika no buka solusaun,” Brigadeiru Jeneral Filomino Paixao.
Iha tinan ida ne’e kazu ne’ebe involve membru PNTL no F-FDTL iha teritoriu tomak durante ne’e hamutuk 21.
Tanba nia dehan, situasaun sira ne’e labele akontese bebeik tanba forsa rua ne’e kaer knar importante iha nasaun ida ne’e no tenke hatudu exemplu ne’ebe diak iha sosiedade nia leet.