- Publika iha: 10 Março 2017
Governu liu husi Ministeriu Saude aloka ona orsamentu hodi harii klinika espesial ida hodi fo atendementu ba ema moras mental sira e agora iha hela prosesu identifikasaun fatin.
Diretor Jeral Ospital National Guido Valadares (HNGV), Jose Antonio hateten nia parte ladun hatene total orsamentu ba obra ne’e maibe apresia tebes ba desizaun governu nian ne’e, tanba nesesariu duni.
Nia hateten, prosesu hotu inklui dezenho no BOQ remata ona e hein halo konstrusaun deit.
“Ema sira mai ho agresivu ou la’e ba direita iha klinika ne’ebe sei harii labele liu husi ona odamatan emergensia publiku,” nia hateten iha Hotel Timor, Dili.
Nia dehan, durante ne’e pasiente moras mental mai sempre liu husi sala emergensia publiku e espera katak bainhira klinika ne’e estabelese ona sei iha atendementu ketak.
Maske laiha klinika espesifiku, maibe nia dehan atendimentu ba ema moras mental nafatin la’o no sira servisu hamutuk ho sosiedade sivil inklui Psychosocial Recovery and Development In East Timor (PRADET) no Sao Joao de Deus Laclubar hodi halo akompanhamentu ba pasiente sira.
Dadus Ministerio Saude nian iha tinan 2015, hatudu katak ema nain 1948 mak sofre moras mental, kompostu husi feto 1059 no mane 889.
Membru Komisaun F (saude, edukasaun, kultura, veteranus e igualidade jeneru), Leonel Marçal hateten nesesario tebes atu iha espasu ida ketak hodi halo tratamentu ba ema ho moras mental, tanba dadus Timor iha numeru ne’ebe bo’ot.
Nia dehan ema moras mental iha direitu atu asesu ba tratamentu saude ne’ebe dignu.
“Dalabarak liu ema sira ne’e ladun hetan tratamentu diak iha familia, entaun estado iha dever tau matan no fo tratamentu ne’ebe diak e dignu ba sira,” nia hateten.
Nia dehan, moras mental ne’e problema social la’os setor saude nian mesak tanba ema moras mental balun bele rekopera kuandu familia mos apoia maka’as.