- Publika iha: 14 Março 2017
Membru Parlamentu (MP) Nasional deskunfia katak iha buat ruma lalos ho selesaun estudante foun iha Universidade Nasional Timor –Leste (UNTL), tanba estudante ho valor ki’ik bele liu, enkuantu valor bo’ot la liu.
MP Osorio Florindo, hateten sasukat atu tama fakuldade medicina iha UNTL tenke ho valor masimu 53 no minimu 37, maibe estudante ho valor 37 bele liu enkuantu valor 41 no 42 la liu.
“Estudante lubuk ida mak la passa maske sira nia valor bo’ot, sira iha esperansa bo’ot tebes hakarak eskola iha UNTL,” MP Florindo kestiona, iha Parlamentu Nasional.
Tuir nia, prosesu hotu tantu hahu husi teste to’o deside estudante ida pasa ou la’e ne’e husi Ministeriu Edukasaun, entaun husu ba ministeriu atu esklarese ba publiku.
“Tanba saida mak mekanismu ne’e la’o la tuir kriteria ne’ebe determina ona,” nia kestiona.
Hatan ba kestaun ne’e, Ministru Edukasaun Antonio da Conceicao, esplika, katak prosesu selesaun iha kanal tolu; primeiru teste bazea ba aplikasaun ne’ebe sira hili rasik, segundu tenke tuir valores ne’ebe determinadu ona, no terseiru kanal 10%.
Nia hateten, bareira 10% ne’e oferese no atu garantia estudante sira ne’ebe mak husi familia kbi’it laek liu, inan aman mate hotu iha ailaran, entaun presiza fo prioridade ba sira.
“Kanal 10% ida ne’e intervensaun husi Ministeriu Edukasaun nian duni,” nia hateten.
Iha estudante barak mak la passa iha fakuldade medicina, tanba nia dehan iha mos politika kona ba fo reprezentasaun dos minisipiu.
Pur exemplu, nia dehan estudante husi Dili ninian, iha ona reprezentasaun ho nota maior, maibe estudante ne’ebe mai husi munisipiu ho valor ki’ik, ida ne’e mos presiza fo oportunidade.