- Publika iha: 15 Março 2017
Polisia hapara tiha ona operasaun ba jogu casino ne’ebe durante ne’e buras iha Dili laran, tanba governu liu husi Ministeriu Komersiu Industria no Ambiente legaliza ona atividade ida ne’e.
Segundu Komandante Jeral Polisia Nasiona Timor-Leste (PNTL), Komisariu Faustino da Costa hateten antes ne’e governu liu husi dekretu lei, bandu jogu sira ne’ebe governu seidauk legaliza atu la bele existe liu-liu casino.
“Ami halo diskusaun ho ministeriu publiku, katak maioria jogu casino ne’e governu legaliza ona,” Komisariu Costa hateten.
Nia hateten, governu legaliza jogu ne’e ho intensaun atu governu no parte seguransa bele kontrola no bele hatama reseitas ba estadu liu husi selu impostu.
Maibe, nia husu ba governu atu fo dadus ba PNTL kona ba casino ne’ebe governu konsidera legal nune’e fasil atu kontrolu.
Tanba nia informa, iha Dili jogu casino loke iha fatin rua no iha munisipiu Covalima iha fatin ida.
Iha parte seluk Deputada Jacinta Abuc Cau Pereira, rekonese katak durante ne’e governu bandu jogu casino ne’e maibe iha realidade jogu ne’e buras iha Dili laran, entaun deside legaliza tiha deit.
“Legalize, tanba bazea ba esperiensia ne’ebe mak iha liu-liu governu nia kontrolu ba jogu sira ne’e defisil tebes,” nia dehan.
Nia konkorda ho desizaun governu nian ne’e, maibe tenke iha regras ne’ebe adekuadu, liu-liu jovens no labarik sira atu labele involve iha jogu ne’e.
“Sela’e bele estraga sira nia mentalidade no sira nia futuru,” nia dehan.
Iha parte seluk Deputadu Arao Noe, hateten ida ne’e diak maibe presiza hametin kontrolasaun no seguransa.
Tanba nia dehan, jogu ne’e iha nia impaktu ne’ebe integradu ba familia sira, tanba wainhira xefe da familia ida partisipa iha jogu ne’e sei hasai osan lubuk ida.
“Sei nia hasai osan barak ba jogu ne’e, oinsa nia bele rai osan hodi dudu nia oan ba eskola,” nia dehan.