Polisia Kontinua Halo Cek Point Buka Sasan Kroat

Polisia Tranzitu Nasional kontinua halo cek point ba kareta ho motor sira ne’ebe deskonfia lori sasan kroat hanesan rama Ambon, senapan no tudik, liu-liu iha tempu kalan.

Komandante Polisia Munisipiu Dili, Superintendente Assistente Policia Euclides Belo hateten sira alarga ona sistema operasaun hodi halo cek point ba movimentu transportes tantu publiku no privadu ne’ebe mak deskonfia lori sasan kroat.
Operasuan ida ne’e, nia hateten relasiona ho joven nain tolu ne’ebe sai vitima tanba hetan sona husi ema deskonhesido iha loorn hirak liu ba, ida hetan sona iha Palapaso no nain rua seluk iha Taibesi, iha tempu kalan.
“Vitima agora halo hela tratamentu iha ospital nasional, nain rua seluk alta ona,” nia hateten, iha Kaikoli, Dili.
Nia hateten, mesmo ke sira alta ona iha uma maibe sira sei movel hodi halo tratamentu hodi rekopera sira nia kanek ne’ebe sira hetan husi asaun ne’ebe mak suspeito sira halo.
Tamba ne’e, nia dehan sira ne’ebe utiliza rama Ambon ka armas branka hodi halakon ema seluk nia vida no hakanek ema seluk, sei regula tuir lei ne’ebe iha.
“Lei ne’ebe regula kona ba kazu hakotu ema nia vida, hakanek ema seluk sei prosesu tuir lei No.5/2017, utiliza rama ambon senapan no armas branka sira,” nia hateten.
Enkuantu suspeitu, nia dehan seidauk kaptura no agora rekolha hela informasun, buka hela transporte ne’ebe sira utiliza, sira fiar katak sedukka tarde sira sei kaptura suspeito ne’e hodi prosesa tuir lei.
Entretantu hanesan komunidade nudar mos inan Rita da Costa hateten agora la’os ona tempu atu joven sira estraga malu, oho malu maibe presiza prepara aan ba futuru tanba Timor presiza jerasaun foun ne’ebe iha kualidade.
“Husu ba joven sira ne’ebe kontinua sona malu ba hana malu sub-subar, hahalok ida ne’e la diak no imi tenke haree ba imi nia futuru saida mak imi atu halo,” nia dehan.
Nia sujere, ba polisia tenke asegura seguransa iha sidade Dili no diak, liu liu iha tempu kalan atu nune’e labele mosu tan joven sira oho malu iha rai doben ida ne’e.
Iha parte seluk Adjuntu Diretor Ezekutivu Fundasaun Mahein (FM), Joao Almeida hateten konflitu la’os foin mak akontese maibe bei-beik ona e asuntu rama ambon ida ne’e mak importante ba iha Polisia atu halo prevensaun.
“Kuandu kazu sira ne’ebe identifika uza rama ambon no kazu violensia sira seluk ne’ebe mak akontese, tenke prosesu tuir lei ne’ebe iha,” nia hateten.
Iha Lei No.5/2017 ne’ebe regula kona ba ema sira ne’ebe uza rama ambon ka armas branka sira hodi hakanek ema seluk no hakotu ema seluk nia vida e polisia bele prosesa suspeitu sira tuir lei ne’e.