Xefe suku no komunidade suku Soba, postu administrative Laga, munisipio Baucau lamenta ho servisu kompania ne’ebe tinan ida resin ona abandona hela obra konstrusaun postu saude sein razaun.

Xefe Suku Soba, Francisca Monica lamentavel ho kompania ne’ebe abandona obra sein razaun.

Xefe suku Francisca Monica, hateten kompania la’os deit abandona servisu, maibe trabalhador sira ne’ebe hala’o servisu mos kompania seidauk halo pagamentu.
Nia dehan, sira hato’o ona preokupasaun ne’e ba iha autoridade munisipio Baucau nian, maibe seidauk iha solusaun tanba pagamentu ba kompania seidauk halo.
“Ami husu hela edukasaun nia sala ida hodi fasilita mediku sira fo tratamentu saude ba komunidade sira, maibe ami mos ejiji nafatin atu ami nia postu saude ne’e bele remata,” nia hateten via telephone.
Alende postu saude, nia dehan iha mos projetu seluk ne’ebe kompania ida seluk abandona hela mak konstrusaun uma ba professional saude sira iha suku Soba.
Nia dehan, obra ne’e mai husi projetu Implementasaun Dezenvolvimentu Munisipio nain ne’ebe kaer husi kompania local ida.
Iha parte seluk, Diretor Organizasaun Luta Hamutuk (LH) Jose da Costa hateten monitorizasaun ne’ebe sira halo liu –liu ba dezenvolvimentu infra-estrukturas hatudu projetu ki’ik barak mak kompania sira abandona hela, tanba legalidade la klaru liu –liu laiha tenderizasaun, BOQ, maibe projetu bo’ot sira hanesan Autor Estrada no postu Comoro III laiha problema.
Nia dehan, projetu abandona ne’e sai ona tradisaun ida iha rai laran tanba la’os deit iha munisipio maibe iha capital Dili mos akontese hanesan projetu eletrisidade, dreinajen kuaze tinan –tinan akontese.
“Governu foun ida ne’e presiza haree didiak, liu –liu halo re-inspesaun atu hatene tuir prosesu tenderizasaun projetu sira ne’e no tanba sa parado,” nia hateten.
Nia hateten, ho krize politika ne’ebe akontese iha rai laran fo implikasaun bo’ot liu tan ba iha problema sira ne’e tanba governu la sente definitive hanesan orgaun ezekutivu atu jere governu ida ne’e hodi atende povu nia nesesidade.
Nudar sidadaun, nia sente triste ho governasaun ida ne’e tanba fulan neen ona laiha mudansa marka pasu deit iha fatin, problema social komesa mosu.