Xefe Unidade Sentru Infomasaun no Keixa iha Ospital Nasional Guido Valadares (HNGV), Enfermeiru Americo dos Santos hateten sentru keixa ne’e importante tebes atu bele halo intervensaun ba problemas ne’ebe akontese iha ospital.

Sentru keixa iha HNGV importante tebes, tanba bele halo intervensaun kedas ba problemas ne’ebe akontese iha ospital.

Hafoin estabelese sentru keixa ne’e, nia hateten hafasil tebes sira atu rezolve problemas ne’ebe akontese iha ospital relasiona ho atendimentu saude.
“Fatin keixa ne’e importante tebes atu ita bele halo analiza ba problema sira no toma atensaun tomak hodi hadia ospital ne’e ba oin sai diak liu tan,” nia hateten iha servisu fatin Bidau, Dili.
Nia hateten, kada loron sira simu keixa liu 10, keixa sira ne’e relasiona ho atendimentu professional saude sira nian ladun diak hanesan (hirus pasiente, atendimentu tarde), seguransa no higiene.
Depois simu keixa, ba kazu bo’ot nia hateten, sira halo relatorio ba iha diretor atu rezolve iha konselho diretiva, maibe ba kazu sira atendimentu halo aprosimasaun ba iha pesoal saude identifikadu, familia pasiente no lideransa departamentu hodi rezolve.
Nia hatutan, HNGV iha dezempenha ne’ebe diak tebes intermus rekursu humanus no ekipamentus, maibe problema sira ne’e nafatin mosu tanba familia pasiente no pasiente mak laiha pasensia.
Nia dehan, dala barak problema mosu tanba familia pasiente la pasensia hein liu –liu iha sala Banku Urgensia, familia hakarak tenke atende lalais, maibe haluhan tiha katak professional saude sira sei atende uluk kazu ne’ebe urgente.
Iha parte seluk Diretora Jeral Prestasaun Servisu iha Ministerio da Saude, Dotora Odete Viegas konkorda katak sentru ne’e nia papel importante tebes atu halo analiza no avaliasaun ba iha servisu sira ne’ebe lao iha ospital.
Nia hateten, ho sentru ida ne’e familia no pasiente sira bele hato’o sira nia lamentasoens direita hodi hafasil ospital atu toma responsabilidade rezolve, la presiza hato’o tutan ba ema seluk.
“Jestor sira bele haree numeru keixa ne’ebe tama no automatikamente foti asaun karik relasiona ho atendimentu ne’ebe ladiak bele halo planu atu muda atetude profesioal saude sira nian hodi fo atendimentu ne’ebe diak ba ita nia pasiente sira, ida ne’e mak ita nia espetativa,” nia hateten.
Nia husu, mos ba dirijente ospital referral sira no sentru saude ne’ebe iha sala interamentu atu estabelese mos hodi bele fasilita rezolve problema sira ne’ebe dala barak akontese iha ospital sira.