- Publika iha: 28 Setembro 2020
Kordenador Jeral Komisaun Nasional Kombate Surtu COVID-19, iha Ministerio da Saúde, Doutora Odete da Silva Viegas anunsia ba publiku katak iha loron 27 Setembru, Timor-Leste registu hikas kazu konfirmadu pozitivu ida (1) ba COVID-19.
Nia salienta, pasiente pozitivu refere viajen husi Medan, iha Indonesia, iha loron 11 fulan Setembru ba Jakarta, no iha loron 12 kontinua viajen husi Jakarta toba kalan ida iha Kupang. Iha loron 13 Setembru nia halo viajen hamutuk ho ema nain 168 tama Timor-Leste liu husi fronteira terestre iha Batugade.
“Pasajeirus ne’ebe mai hamutuk iha momentu ne’eba ema nian 168. Husi ne’e nain 160 tama iha fasilidade kuarentina governu nian, no ema nain rua iha autokuarentina. Ema ne’ebe hamutuk ho sidadaun konfirmadu ne’e hamutuk nain 13 tanba ne’e sira ne’e hahu fali halo kuarantina loron primeiru sura husi ohin,” nia hateten liu husi konferensia imprensa iha sala Izolamentu Vera Cruz, Dili.
Nia dehan, agora dadaun governu aplika 17 dias ba fronteira terestre, signifika kada 17 dias mak loke fronteira duranet oras rua deit, maibe realidade tama ilegal lorloron kontinua aumenta makas tanba ne’e ekipa kontinua halo vijilansia atu evita akontese transmisaun komunidade.
“Husu mos ba sidadaun sira ne’ebe mai Timor presiza lori teste ne’ebe mak governu Timor, liu husi ministerio da saúde fo mak Swab Polymerise Chain Reaction (PCR). Ita la autoriza ema tama Timor ho sertifikadu rapid test tanba ita nia pasiente ne’ebe positivu agora mai ho rezultado rapid test,” nia hateten iha konferensia imprensa.
Nia dehan, sira hato’o ona informasaun ne’e ba iha konsuladu sira iha rai liur atu sosializa ba sidadaun sira ne’ebe atu mai Timor-Leste tenke lori PCR test. No sira ne’ebe mai ho rapid test sei deporta fila.
Tuir dadus kumulativu COVID-19, hahu fulan Marsu to’o loron 28 fulan Setembru tinan 2020, hatudu total teste hamutuk 7,791 no husi ne’e nain 493 sei hein rezultado no nain 7,260 rezultado negative, no nain 28 konfirmadu positive, kompostu husi nain 27 rekuperadu no nain ida halo tratamentu oras ne’e iha sala izolamentu Vera Cruz.
Alende ne’e, sidadaun ne’ebe hela iha kuarantina no autokuarentina hamutuk nain 810 kompostu husi kuarantina fasilidade governu hamutuk nain 521, no autokuarentina nain 289, no sidadaun ne’ebe pasa ona loron 14 kuarentina hamutuk nain 4379.
Iha parte seluk, Komunidade Mariano Soares hateten bainhira movimentu ema nian tama no sai husi nasaun akontese mak posibilidade bo’ot atu registu kazu tanba moras ne’e iha hela ema nian isin sirkula ba mai hela.
Nia dehan, agradese tanba Timor-Leste regitus kazu maioria lijeiru no sidadaun sira ne’e detekta bainhira sei iha kuarantina.
“Ita grasa de Deus kazu sira ne’ebe ita detekta ne’e la grave, no sira ne’e hela iha kuarantina, maibe ita tenke halo atuasaun seriu, liu-liu vijilansia makas iha area fronteira atu evita problema ne’ebe ita rasik sei labele responde bainhira akontese,” nia hateten.
Iha oportunidade ne’e, nia husu estado liu husi governu atu toma atensaun makas ba area fronteira terestre tanba dadus hatudu kada loron ema tama ilegal barak, signifika movimentu iha fronteira makas no situasaun ida ne’e risku bo’ot tebes atu akontese transmisaun komunidade.