- Publika iha: 01 Outubro 2020
Segundo Komandante Polisia Munisipio Dili, Superientendente Euclide Belo hateten katak atu redus krime sira ne’ebe mak akontese iha kapital Dili, komando PNTL reativa hikas seksaun polisial hotu hodi halo operasaun 24 oras.
Nia dehan, kazu krime sira ne’ebe mak akontese iha Dili laran tanba problema privadu, aktividade ilegal sira, no ema sira ne’ebe mak konsumo alcohol iha dalan publiku hamosu perturbasaun hodi limita movimento komunidade nian.
“Atu redus tipo krime hira ne’e, komando reativa hikas seksaun hotu halo operasaun tuir teknika polisial 24 oras,” Segundo Comandante Dili Belo hateten.
Tanba ne’e nia dehan, iha operasaun ne’e proibido liu ba jogo ilisito, arma branka, konsumu alcohol iha dalan publiku, no ba situasaun refere ne’e polisia hetan la iha toleransia.
“Operasaun ne’e ita konsegue kaptura ona suspeito nain 6 ne’ebe mak komete iha tipo krime ne’e ita mensiona hodi submete ba ministerio publiku hodi halo prosesu,” nia hateten.
Nia dehan, patrulhamento kalan ne’e polisia utiliza nia maneira rasik ne’ebe mak mai segredo nune’e bele fasil atu identifika movimento kriminozo sira nian.
Entretanto, Diretor Ezekutivo Fundasaun Mahein (FM), Joao Alemida hateten tuir obesrvasaun FM iha Dili kazu krime kuntina akontese tanba vizibilidade polisia menus iha fatin publiku nune’e mos iha komunidade let.
“Relatorio ita rekomenda bei-beik ona katak kapital Dili atu minimiza kazu krime sira ne’e, tenke haforsa than vizibilidade polisia nian,” Diretor FM Almeida hateten.
Nia dehan, iha munisipio seluk vizibilidade polisia nian iha komunidade diak tebes, no garante duni komunidade moris livre husi konflito.
“Ita hare iha tempo kalan foin tuku 8 movimento komunidade nian rame hela maibe prezensa polisia nian la iha,” nia hateten.
Nia dehan, lolos ne’e kapital Dili garante seguransa tenke diferente ho munisipio seluk, tanba Dili fatin konsentrasaun populasaun, admistrasaun publiku, no economia hotu.
Iha parte seluk komunidade Benvinda Boavida hateten, durante estado emergensia iha fulan marsu to’o julho 2020 kazu krime menus maibe dadaun ne’e rama ambon komesa mosu hodi hamate liberdade sirkulasaun ema nian.
“Ita husu polisia tenke, halo serviso ho serio hodi halo prevensaun ba kazu rama ambon iha Dili laran nune’e ema hotu bele livre hodi halo nia aktividade kualker tempo,” Boavida hateten.
Nia dehan, atu halo prevensaun ba kazu rama ambon, polisia tenke serviso hamutuk ho autoridade lokal sira nune’e bele identifika ema sira ne’ebe mak utiliza rama ambon hodi submete ba prosesu.