Kazu Asaltu Malu Ne’ebé Rejistu AS Kauza Husi Alkohol

Komandante Polísia Munisípiu Díli, Superientendente Xefe Orlando Gomes dehan, kazu asaltu malu ne’ebé mak dadaun ne’e rejistu as iha kapital Díli ne’e nia kauza husi joven sira ne’ebé konsumu alcohol.

Nia dehan, tuir relatóriu ne’ebé iha hatudu katak, kazu asaltu malu ho númeru hamutuk 45 maioria husi postu Dom Aleixo, no kauza husi konsumu alcohol depois tur ida estrada hodi halo asaltu ba ema seluk.

“Husi kazu sira ne’ebé mak komandu rejistu, kompostu husi violénsia doméstika no kazu krime sira seluk no iha kazu asaltu ne’e mak dadaun ne’e rejistu as iha kapital Díli,” nia dehan.

Nia dehan, atu halo prevensaun ba kazu asaltu malu ne’e polísia koloka ona membru sira ba iha área sira ne’ebé mak sempre akontese kazu asalta malu.

“Liu-liu iha tempu kalan ita-nia joven sira sempre konsumu alcohol hodi tur iha dalan ninin hodi halo asaltu ba seluk. Ida-ne’e ita la tolera ita sempre halo intervensaun no kaptura hodi submete ba prosesu,” nia dehan.

Iha parte seluk Komunidade Maria da Costa dehan, iha sira-nia bairu, bainhira iha tempu kalan movimentu la seguru, tanba sempre hetan asaltu husi joven sira ne’ebé mak sempre hemu lanu no tur iha estrada.

“Hahalok ne’ebé mak joven sira halo ne’e hamate ita-nia liverdade ba movimentu nian, kalan ita presiza atu sosa nesesidade ruma ka lori labarik sira ba ospitál mós ita sente la seguru, tanba hahalok inmoral joven sira-nian,” nia dehan.

Tanba ne’e husu polísia atu toma atensaun ho sériu ba asuntu ne’e tenke servisu hamutuk ho autoridade lokal sira no inan-aman atu kontrola ona sira-nia atvidade iha tempu kalan.