- Publika iha: 02 Janeiro 2024
Xefe suku Loi-Lobu, Joanico da Costa Freitas informa labarik no foinsa'e idade eskola sira barak mak la asesu ba edukasaun formal tanba família la iha kbi'it atu selu eskola.
Nia dehan iha Konstituisaun RDTL artigu 59, katak ema hotu iha direitu ba edukasaun ho gratuita. Maibé la ba karik sira iha suku Loi-Lubo tanba iha de’it eskola pre-primária no sekundáriu privadu, ne’ebé tenke selu.
"Labarik idade eskola kuaze 25% la asesu ba edukasaun, tanba inan-aman la iha kb'it atu selu no ita labele haruka sira ba eskola tanba distansia husi suku ba Triloka dook 10 km," nia hateten.
Nia hateten preokupasaun ne'e sira hatoo ona ba munisípiu no nasional atu harii eskola pre-primária no sekundária publiku ida atu labarik sira asesu, maibé seidauk iha resposta positivu.
Nia hatutan iha tinan kotuk sira hetan apoia doasaun Fundus husi Education The Future, Australia hodi harii ona eskola pre-eskolar ba labarik sira ho idade tinan 3.
Nia haktuir nesesáriu tebes atu harii eskola iha suku Loi-Lobu nu’udar sentru ba Suku Uatolari, Suku Osouala no Ostiku.
Kona-ba bee moos, nia dehan komunidade hotu iha ona asesu ba bee moos ne’ebé fornese husi BTL, maibé kuantidade bee menus tanba nee tenke halo oráriu atu bele asegura ema hotu iha asesu ba bee moos ba nesesidade.
Nia informa total populasaun iha suku Loi-Lobu hamutuk 1768 ho xefe uma-kain 400 resin.
Iha parte seluk, komunidade Maria Freitas hateten preokupasaun sira nian mak edukasaun tanba sira iha de’it SMP no SMA-K ne’ebé tenke selu. Entaun família sira ne’ebé oan barak balun la eskola.
"Ita haruka ba Díli mós so ita-nia osan iha, tanba família laiha sira selu tan uma kost, entaun eskola besik para ami-nia oan sira asesu ba edukasaun," nia hateten.
Nia hateten estadu hakarak rekursu humanu ida kualidade iha futuru tenke konsidera preokupasaun komunidade nian tau matan ba labatik sira-nia edukasaun.
Tuir observasaun TDW iha terenu, total estudante pre-eskolár Loi-Lobu hamutuk na’in 20 resin ho profesora nain rua. Kondisaun infra-strutura, sira uza kuartu ida iha sede suku hodi tuir prosesu aprendizajan no eskola ne'e mós enfrenta limitasaun ekipamentu kadeira meja ba labarik sira.