Membru F-FDTL 12 ba hala’o misaun ONU nian iha Libano

Membru Forsa Defeza Timor-leste (F-FDTL) nain 12 husi Unidade Enjenaria hamutuk ho Batalliaun Unidae Portugal hala’o misaun Nasoens Unidas (ONU) nian iha Lebanon durante fulan 6.
“Sira na’in 12 ne’e fulan 6 iha Portugal sei tuir treinu adaptasaun ho ita nia belun no maluk forsas armadas husi Portugal, hafoin sira ba hamutuk Lebanon hodi tulun povu Lebanon,” hateten Xefe Estadu Jose Ramos Horta, semana kotuk iha Palacio Prezidente Nicolau Lobato, Bairo-Pite, Dili. Tuir Konstituisaun RDTL, forsas armadas bele fo nia kontribuisaun liu husi misaun paz ONU nian hodi fo tulun ba nasaun seluk ne’ebe presiza tulun.
“Ida ne’e hanesan misaun primeira vez husi forsas armadas maibe iha tinan 7 liu ba ita nia elementus balun PNTL ba servi iha nasaun Kosovo ho Nasoens Unidas e sira servisu ho disntinsaun no profesionalizmu,” Horta konta.
Prezidente Horta mos husu ba forsas nain12 ne’ebe ba hala’o misaun iha Lebanon, atu mantein unidade no disiplina iha ema nia rain.
“Ida ne’e oportunidade diak ba imi maibe mos todan maka’as iha imi nia kabaz, tanba imi ba la’os hanesan enjenaria ida, la’os hanesan military deit maibe imi ba hanesan embaixador Timor-leste nian tanba lori bandeira Timor nian, hatudu imi nia dignidade, profesiionalizmu no sentidu disiplina,” Xefe Estadu fo lia menon.
Entretantu tuir Xefe Estadu Maior Jeneral Taur Matan Ruak, katak ho prezensa elementus forsas enjenaria na’in12 iha Lebanon, hanesan avansu pozitivu no konkista bo’ot ida ne’ebe Timor hetan.
“Tanba ne’e ita presiza treinu ita nia ema ho diak liu tan,” nia dehan.
Tuir nia, durante tuir formasaun iha Portugal, sira sei aprende kona-ba konstrusaun, halo pontes no seluk tan. “nune’e sir abele hetan kapasidade diak liutan bainhira hala’o misaun ONU nian iha Lebanon,” nia katak.
Enkuantu Jose Antonio Nunes da Costa, elementus ne’ebe hola parte iha misaun ne’e, hateten ne’e oportunidade ne’ebe diak ba sira hodi partisipa iha misaun ONU nian iha Lebanon.
“ Antes ida ne’e ami iha aktividade barak ne’ebe ami halo iha enginaria ne’ebe iha Timor laran ne’e ami halo iha Distritu iha area umanitaria, liu-liu kona ba rehabilitasaun escola, klinika,” nia dehan.