Domingo, Outubro 22, 2017
Total visitors: 184911

Tuir lei do trabalho artigu 44, katak trabalhador iha direitu atu hetan subsidio annual ho valor minimu hanesan salario mensal ida,no kompania iha obrigasaun atu selu subsidio annual ba trabalhador sira.

Diretor Jeral Sekretario Estado Politika Formasaun Profesional e Empregu (SEPFOPE), Jacinto Barros Gusmão, hateten ema hotu tenke hakruk ba lei ne’ebe vigora ona.

“Lei hateten obrigatorio tenke fo gaji 13, antes tangal 20 tenke selu ona trabalhador sira nia subsidio annual, ne’e sira nia direitu,” DJ Barros hateten, iha Kaikoli, Dili.

Maske nune’e nia dehan, depende mos ba iha konsensus ne’ebe hala’o husi empregado ho trabalhador sira rasik iha servisu fatin, karik iha meus seluk hanesan subsidio ba saude no seluk tan ne’ebe konsidera mos subsidio annual.

Kestaun seluk ne’ebe presiza hare mos mak lukru husi kompania rasik, tanba kompania ne’ebe laiha lukru bele ameasa taka bainhira selu tiha subsidio annual ba trabalhador sira no bele fo impaktu mos ba futuru trabalhador sira, bele sai dezempregadu.

Iha parte seluk, reprezentante Konfederasaun Sindikatu Timor –Leste (KSTL), Jose da Conceição da Costa, hateten ne’e obrigatoriu ba empregador sira atu selu subsidio annual ba trabalhadores, tanba lei mak haruka.

“Trabalhador iha direitu ba subsidio annual ho nia valor minimu hanesan salariu mensal ida ne’ebe tenke selu to’o loron 20 fulan Dezembru kada tinan sivil,” nia dehan.

Entretantu, Deputado Inacio Moreira, hateten iha lei do trabalho koalia kona ba subsidio annual, maibe la difini klaru kona ba kompania, presiza hare didiak. 

“Hau hanoin presiza hare didiak no hau mos sei buka tuir to’ok ida ne’e, tanba la defini klaru,” Deputadu Moreira hateten.

E-mail Subscription

Enter your email address:

    Poll

    Nothing found!

    Follow us on Twitter