- Publika iha: 28 Janeiro 2014
Ministeriu Petroleo e Recursos Naturais oras ne’e dadaun kapasita hela foinsa’e distritu Suai ho kursu lian Ingles, nune’e sir abele partisipa iha projetu supply base ne’ebe sei hala’o iha tempu badak.
Responsavel Programa Bolsu Estudu Ministerio Petroleo e Rekusru Minarais (MPRM), Ana Lucinda, hateten programa kursu lian Ingles ne’e hala’o durante tinan ida.
“Ami foka liu ba iha distritu Suai, atu responde ba projetu supply base ne’ebe sei tama iha ne’eba,” responsavel Lucinda hateten, iha Hotel Ramelau Aimutin, Dili.
Nia dehan, kursu ne’e la’os deit partisipa husi jovens, maibe ferik katuas inklui labarik sira hamutuk 2.000 resin.
Alem de ne’e nia hatutan, ministerio mos fo oportunidade ba graduadu lisensiatura area engineria petroleo no geologia atu hasa’e konesementu ba lian Ingles iha St. Joseph Engineering College Mangalore ,India.
Oras ne’e dadaun, nia dehan, bolseirus hamutuk 96 mak tuir hela formasaun kona ba lian Ingles iha India.
Entretantu, Ministru Petroleo e Rekursu Minareis, Alfredo Pires, hateten lian Ingles ne’e importante tebes ba area petroleo no minareis tanba ne’e tenke prepara foinsa’e sira iha aspeitu tekniku no lingua hodi dezenvolve rasik riku soin ne’ebe Timor –Leste iha.
“Ami hasoru problema ida; estudante ida remata estudu iha Indonezia iha area petroleo iha konesementu ne’ebe diak tebes, maibe nia labele servisu iha area ida ne’e tanba la hatene lingua Ingles,” Ministru Pires dehan.
Tanba ne’e, nia dehan, programa kapasitasaun lian Ingles iha distru Suai ne’e positive tebes, hatudu progresu ne’ebe signifikante tanba partisipantes maoria koalia hatene no komprende ona dalen Ingles maske foin tinan ida.
Iha parte seluk, foinsa’e Benjamin da Costa, kongratula ba progresu ida ne’e, hatudu katak governu la presiza lakon osan barak hodi haruka deit ema ida ka rua ba aprende lian Ingles iha nasaun seluk.
“Governu la presiza haruka ba rai liur atu aprende lian Ingles,” nia dehan.