- Publika iha: 14 Abril 2014
Membu Parlamentu Nasional lamenta ba hahalok Xefe Suku Fatukero, distritu Ermera ne’ebe entrega uma Millennium Development Goal’s (MDG’s) ba funsionariu publiku, tanba uma hirak ne’e governu halo ba ema kbi’it la’ek sira.
Deputadu Agostinho Lay, hateten uma MDG’s hirak ne’e kompania seidauk entrega ba governu, maibe xefe suku iha suku ne’e foti desizaun hodi entrega ba funsionariu sira hodi hela ba.
“Uma ne’e ema ida-idak ba hamoos tiha ona hodi sira hela, e funsionariu publiku ho membru polisia mak ba hamoos fali,” Deputadu Agostino Lay kestiona, iha plenaria Parlamentu Nasional.
Deputadu Lay, hateten uma MDG’s iha suku Fatukero ne’e, la’os deit ba ema kbi’it la’ek iha suku ne’e maibe sukus hotu iha distritu Ermera, enkuant lista ne’ebe xefe suku Fatukero haruka ba Ministerio Solidaridade Sosial ne’e iha deit 160 pesoas.
Deputadu n’e mos proekupa, tanba maske konstrusaun ba uma MDG ne’e remata ona maibe seidauk kompleta ho bee moos inklui eletrisidade.
“Uma MDG iha suku Fatukero ne’e iha 200 resin ba ema kbi’it la’ek sira, maibe barak naran laiha,” Deputadu Lay hateten.
Iha fatin hanesan Komunidade Ermera atual Deputadu Antonio dos Santos, husu atu halo investigasaun ba xefe suku Fatukero, tanba uma ne’e kompania seidauk entrega ba governu.
“Tenke investiga xefe suku ne’e, tanba ami ba konfirma ho Kompania BTK ne’ebe kaer obra ne’e, dehan seidauk entrega ba governu,” nia hateten.
Nia hateten, uma MDG iha suku Fatukero ne’e Administrador sub-distritu Railako seidauk hatene (finalidade uma ne’e), maibe xefe suku entrega ona ba funsionariu sira.
Iha fatin ketak Sekretariu Estadu Interinu Asuntu Parlamentar, Nelio Isaac Sarmento, rekonese katak ate agora govenru seidauk entrega uma MDG ne’e ba iha autoridade local iha suku ne’e.
“Kona ba see mak atu hela iha uma ne’e, govenru presiza atu resolve,” nia hateten.
Nia dehan, uma MDG ne’e la’os deit ba populasaun Fatukero, maibe mos ba populasaun kbi’it la’ek distritu Ermera tomak.