- Publika iha: 24 Abril 2014
Projetu rehabilitasaun ba prizaun Suai, distritu Covalima to’o agora seidauk hahu, maske planu ida ne’e tama iha tinan kotuk (2013) nian.
Ministru Justisa (MJ), Dionisio Soares Babo, hateten projetu rehabilitasaun Prizaun Suai seidauk hahu, tanba faila iha prosesu tenderizasaun.
“Ajensia Dezenvolvementu Nasional (ADN) loke tender, maibe laiha kompania ida maka priense criteria ne’ebe iha,” Ministru Babo hateten, iha nia knar fatin, Colmera, Dili.
Tanba ne’e, nia dehan, osan ne’ebe iha tinan kotuk la uja ne’e, sei aloka fali ba projetu ne’e, halo rahabilitasaun ba prizaun Suai.
“Orsamentu uluk ba projetu ne’e iha $800 milioens resin, maibe agora tanba inflasaun entaun ita aumenta ba $924 milioens,” Ministru Babo informa.
Nia dehan, sira sei husu ba iha AND atu oinsa mak bele loke fila fali konkursu ba projetu ida ne’e, nune’e tinan ne’e bele hahu ona obra ne’e.
“Agora ami tuir-tuir hela ADN, atu oinsa bele halo tenderizasaun lalais,” nia dehan.
Iha fatin seluk Deputada Albina Marcal Freitas, konkorda ho sistema servisu AND nian ne’ebe la halo pasa kompania ne’ebe tuir konkursu ba projetu ne’e, tanba la priense kriteriu.
“Tanba ita hakarak halo buat ida ne’ebe ho kualidade,” Deputada Freitas hateten.
Maibe, nia esperansa, katak iha tinan ida ne’e bele hetan kompania ne’ebe priense kriteriu, nune’e bele halo rehabilitasaun ba prizaun ne’e.
“Tanba ita hare prizaun Becora mos komesa nakonu dadaun ona,” nia dehan.