- Publika iha: 16 Julho 2014
Membru Parlamentu Nasional lamentavel ho kondisaun estrada iha sub-distritu Fatuberliko, distritu Ainaro ne’ebe kuak hotu deit.
Deputadu Manuel Salsinha, hateten estrada husi Liquintai-Maubise to’o iha Fatuberliko kuaze a’at total.
“Estrada ne’e mesak kuak deit, ida ne’e fo ameasa ba ema nia vida,” Deputadu Salsinha levanta, iha plenaria Parlamentu Nasional.
Nia hatutan, kuandu motorist sira tula ema, tenke tun la’o fali wainhira ultrapasa kuak bo’ot sira ne’e maka foin sae fali motor.
“Estrada ne’e ita haree la diak liu ona, presiza hadia,” nia hateten.
Hatan ba kestaun ne’e Ministru Obras Publiku (MOP), Gastao de Sousa, hateten governu iha ona planu atu hadia estrada ne’ebe kuak no grave los inklui estrada iha parte ne’eba.
“Ho osan imprestimu, ita sei hadia hotu estrada hahu Dili to’o iha Ainaro, e obra hirak ne’e sei hahu iha tempu badak,” Ministru Sousa hateten.
Enkuantu komunidade Fatuberliku, Paulo Fernandes, hateten kondisaun estrada ne’e perigu tebes ba motorist sira ne’ebe liu, tanba kuak barak los.
“Wainhira udan no bee nakonu iha kuak sira ne’e, ameasa tebes ba ema nia vida,” Fernandes preokupa.