Belun Apoia Alimentasaun Ba Feto Faluk Bogoro

Organizasaun  Belun suporta alimentasaun ba grupu feto faluk sira iha suku Bogoro, sub-distritu Bazartete, distritu Liquisa.

Programa apoia alimentasaun ne’e hanesan asaun dame ida husi NGO Belun ne’ebe selebra sira nia aniversariiu ba da-10 iha tinan 2014, iha distritu Liquisa.

Diretor Ezekutivu NGO Belun, Luis Ximenes, hateten grupu feto faluk hirak ne’e kuaze eis veterana hotu, ne’ebe luta ba independensia Timor-Leste no dezenvolvementu nasaun nian.

“Mana Kasian nudar veterana mos hanesan feto faluk ida, nia bele harii eskola jardin infantile no eskola primaria, ne’e kontribui tebes,” Diretor Ximenes hateten, iha suku Bogoro, Liquisa.

Tanba ne’e, nia dehan, Belun apresia tebes ho esforsu ne’ebe feto faluk hirak ne’e halo no espera katak ho apoia ne’e bele ajuda oituan feto faluk hirak ne’e.

Nia hatutan, apoia hirak ne’e mak hanesan fos saka 10, supermie, sabaun, odol, livru, no aihan sira seluk tan.

Entretantu Prezidente Grupu Feto Faluk suku Bogoro, Madalena Bidau Soares alias Mana Kasian, fo agredese ba NGO Belun, tanba ajuda ona sira nia grupu.

Mana Kasian, hateten durante ne’e sira nia eskola seidauk hetan programa merenda eskolar husi governu, maibe feto faluk sira mak ho voluntariu sosa hahan ba merenda eskolar.

“Merenda eskolar hau mak atende rasik, e fos ne’e bele ajuda ami atu halo merenda eskolar ba labarik sira,” Kasian hateten.