Sexta, Março 29, 2024
Total visitors: 766366

Komunidade suku Loko no suku Fatukono iha sub-distritu Laclo, distritu Manatuto durante tinan 13 nia laran la asesu ba eletrisidade, maibe uja deit lampu tradisional hodi leno uma laran bainhira iha tempu kalan.

Xefe Suku Laku Mesak, Sergio Raimundo Perreira, hateten suku rua ne’e geografikamente iha los area remotas, ho total populasaun 60 resin no to’o agora seidauk monta ahi ba sira. 

“Ami uja alternative seluk hanesan sunu ahi, tau mina rai iha kaleng depois tau sumbu no sunu,” Xefe suku Perreira hateten, iha Laclo.

Nia dehan, kestaun ne’e nia parte hato’o ona ba Sekretariadu Estadu Eletrisidade liu husi proposta annual, maibe ate agora seidauk iha resposta.

Entretantu Deputadu Inacio Moreira, hateten problema falta eletrisidade la’os akontese deit iha suku rua ne’e, maibe kuaze distritu hotu seidauk asesu ba ahi.

“Jestaun governu mak ladiak atu monta ahi eletrisidade ba komunidades,” Deputadu Moreira hateten.

Hatan ba preokupasaun ne’e reprezentante Administrador sub-distritu Laclo, Jacinto dos Santos, hateten agora dadaun governu sei monta eletrisidade iha nivel distritu no sub-distritu.

“No sei to’o ba area rural sira,” nia hateten.

Tanba ne’e nia husu ba komunidade ne’ebe hela iha suku rua ne’e, atu aguenta hodi hein prosesu sira ne’e.