MP Kestiona Klinika Animal Balun Abandonadu

Membru Parlamentu Nasional kestiona maka’as kona ba klinika animal ne’ebe Ministeriu Argikultura e Peskas (MAP) harii iha distritu 13, tanba barak mak abandona ka la funsiona.

Deputadu Aurelio Freitas Ribeiro,kestiona tanba iha tinan kotuk (2013) Parlamentu Nasional aprova orsamentu atu halo klinika animal, maibe depois halo tiha to’o agora laiha atividades.

“Realidade ne’ebe ami haree iha terenu, katak klinika animal ne’ebe halo ne’e abandona hotu bibi no du’ut mak nakonu iha ne’eba,” Deputadu Ribeiro kestiona, iha Parlamentu Nasional. 

Klinika hirak ne’ebe abandona mak hanesan iha distritu Baucau, Viqueque no distritu Lospalos, to’o agora, nia dehan, la funsiona tanba governu la tau atensaun ba kestaun ne’e.

“Ita hakarak kaer osan hodi ezekuta deit, depois osan ne’e hotu nia rejultadu laiha,” nia dehan. 

Hatan ba kestaun ne’e Ministru Mariano Asanami Sabino, rekonese katak klinika animal iha disritu hirak ne’e abandona, maibe iha distritu balun funsiona ho diak.

“Ami hanoin iha fatin barak utiliza ona,” Ministru Sabino hateten.

Klinika hirak ne’ebe abandona ne’e, nia hateten, tanba bainhira atu harii laiha lina koordenasaun ne’ebe diak entre Diresaun Nasional no distritu hirak ne’e.

“Fatin balun ami kategoria iha Programa Dezenvolvementu Distrital, sira halo tiha mais fatin ne’e la estratejiku para atu utiliza,” Ministru Sabino hateten.

Maibe, nia dehan, agora sira iha ona lina koordenasaun servisu ne’ebe diak entre MAP ho parte PDD, ba oin bele halo diak liu tan.

Nia esplika, klinika ne’e nia funsaun mak atu haree liu ba saude animal nian, oinsa bele kurtivu animal ne’ebe kona moras no klinika ne’e kompleta kedas ho aimoruk animal nian.