- Publika iha: 22 Setembro 2014
Membru Parlamentu Nasional lamentavel ho servisu Sekretariadu Estadu Politika Formasaun Profesional e Empregu (SEPFOPE) ne’ebe hala’o projetu hadia estrada Pante Makasar, Distritu Oe-Cusse, tanba estrada ne’e la’os kategoria empregu rural.
Deputadu Manuel Guterres, hateten SEPFOPE so bele hadia Estrada iha area rural liu huis programa empregu rural, maibe estrada ne’e iha kedas vila laran, ne’e Ministeriu Obras Publiku nia servisu.
“Hau presiza hetan klarifikasaun, tanba se la’e halo konfuzaun,” Deputadu Guterres kestiona, iha plenaria Parlamentu Nasional.
Alende ne’e, nia mos husu ba SEPFOPE atu esplika ba Parlamentu Nasional kona ba osan ne’ebe sira uja halo Estrada iha Pantai Makasar ne’e, “estrada ne’e uja husi ne’ebe?,”
Hatan ba preokupasaun ne’e Sekretariu Estadu Illidio Ximenes da Costa, katak estrada ne’e tama programa empregu rural, tanba geografikamente iha kedas area remotas.
“Ne’e lalos, fatin ne’e tama duni iha area rural,” SE da Costa hateten.
Kona ba osan ba projetu ne’e, nia dehan, husi fundus transferensia publiku, estrada ne’e halo ho emergensia, nune’e komunidade bele asesu ba.
Tuir lei, nia dehan, bainhira SEPFOPE uja osan husi capital dezenvolvementu, ne’e Parlamentu bele kestiona tanba ne’e kontra lei, maibe uja osan transferensia publiku ne’e la salah.
“Tanba osan transferensia publiku ne’e fleksibel,” SE da Costa hateten.