- Publika iha: 15 Dezembro 2014
Membru Parlamentu Nasional konsidera tekniku Eletrisidade Timor-Leste (EDTL) ne’ebe governu destaka iha area rural la profesional, tanba lahatene rezolve bainhira mosu sirkuitu ruma.
Deputadu Manuel Castro, hateten tekniku sira ne’ebe koloka iha sub-distritu ne’e ladun professional, tanba wainhira akontese sirkuitu ruma tekniku sira la hatene atu resolve.
“Balun sae ai la hatene, monta eletrisidade balun sei failha, tanba ne’e governu tenke haree didiak ema sira ne’e, tenke fo treinamentu,” Deputadu Castro hateten, iha Parlamentu Nasional.
Nia hatutan, kompara tekniku Timor oan ne’ebe servisu kedas iha tempu Indonezia kapasitadu liu, duke tekniku ne’ebe akaba estudu eletrisidade iha tempu agora.
“Ema tekniku ne’e tekniku duni, la’os hanesan fali servisu administrasaun, hatene alista deit numeru kontador, atende ema sosa pulsa deit, ne’e labele,” Deputadu Castro hateten.
Hatan ba preokupasaun ne’e Ministru Obras Publiku (MOP), Gastao de Sousa, hateten oras ne’e dadaun ministeriu asina ona akordu ho Indonesia, nune’e bele delega sira nia teknik balun, hodi mai fo kapasitasaun ba tekniku EDTL nian.
“Agora ita hein deit koordenasaun tuir mai tanba akordu asina ona, sira nia tekniku mak mai ou ita nian mak ba,” Ministru Sousa hateten.
Nia hateten, tekniku EDTL iha ona kapasidade nato’on, maibe agora sira tenke tuir tan treinamentu atu kapasita liu tan sira nian matenek ne’ebe sira iha ona.
“Hodi servisu diak liu no professional liu iha future,” Ministru hateten.