- Publika iha: 23 Dezembro 2014
Governu Japaun liu husi sira nia embaixada iha Timor-Leste apoia orsamentu USD14 milhaun ba Ministeriu Agrikultura e Pescas (MAP), atu halo irigasaun Bulutu iha sub-distritu Laleia ne’ebe liga ba sub-distritu Vemasse, distritu Baucau.
Ministru Agrikultura e Pescas (MAP), Mariano Asanami Sabino, hateten prosesu tenderizasaun ba irigasaun ne’e sei kanaliza hotu iha Japaun.
“Osan ne’e sira mak ezekuta, tenderizasaun iha ne’eba remata ona tanba hau asiste prosesu tenderizasaun ne’e,” Ministru Asanami hateten, iha Dili.
Irigasaun refere, nia dehan, sei halo ho modelu modernu nian, tanba ne’e sei han tempu ne’ebe kleur, no bele garanti nia kualidade.
Tuir planu, nia dehan, projetu irigasaun ne’e sei halo iha tinan 2015, no iha dia 20 Dezembru tinan ne’e hahu tau fatuk dahuluk nian (primeira pedra).
Iha fatin seluk Deputadu Virgilio Hornai, apresia governu Japaun ne’ebe fo ona apoia orsamentu hodi hadia irigasaun iha rai laran, no espera katak bele hasa’e liu tan produsaun hare kada tinan.
Maske orsamentu ne’e la fo direitamente ba MAP, maibe nia dehan, MAP iha dever bo’ot atu kontrola projetu ne’e, nune’e bele la’o ho susesu.
“Ne’e tama ona iha sira nia projetu no sira rasik mak sei jere direita,” Deputadu Hornai hateten.
Enkuantu komunidade Marizinha da Silva, hateten durante ne’e produsaun hare iha rai laran menus tebes, tanba ne’e ho espera liu husi projeitu ne’e bele hasae produsaun hare nune’e ba future bele hapara importasaun fos husi rai liur.
“Ita haree fos ne’ebe tama mai ne’e barak liu husi rai seluk,” nia hateten.