- Publika iha: 24 Janeiro 2015
Programa harii uma Millennium Development Goals (MDG) ba ema vulneravel ne’ebe durante ne’e halo deit ho kuartu rua, maibe tinan ida ne’e halo ho kuartu tolu.
Diretor Nasional Asistensia Sosial Ministerio Solidaridade Sosial (MSS), Amandio Freitas, hateten rezultadu monitorizasaun hatudu katak uma hirak ne’ebe halo durante ne’e benefisiariu sira la uja, tanba klo’ot liu.
“Politika uluk ne’e ita harii uma iha kompleksu ida no kada uma iha deit kuartu rua, komunidade sira lamenta, tanba ne’e governu deside atu halo uma ho kuartu tolu,” Diretor Freitas hateten, iha Dili.
Alende ne’e, nia dehan, tinan ida ne’e governu muda politika ne’ebe antes ne’e halo uma MDG iha fatin ida deit, maibe halo iha sira nia fatin ida-idak.
Politika foun ne’e, nia hateten, hahu ona iha distritu Aileu, konstrusaun hala’o iha uma fatin benefisiario no kada uma kuartu tolu tanba situasaun real Timor iha membru familia ne’ebe bo’ot.
Iha parte seluk, Sekretario Estado ba Politika Formasaun Profesional no Empregu (SEPFOPE), Ilidio da Costa, hateten sira hetan fiar husi Primeiru Ministru atu dezenvolve produtu tizolu liu husi harii uma lima kada aldeia ne’ebe hala’o ona iha distritu rua.
Iha tinan ida ne’e, nia hateten, SEPFOPE konsege harii ona uma 10 iha distritu rua: hanesan uma lima iha distritu Aileu no Manatuto.
“Ne’e projetu pilotu deit, se sira dehan diak, tau osan ita kontinua no fo servisu mos ba foinsa’e sira,”SE da Costa hateten.
Entretantu Membru Parlamentu, Deputado Eladio Faculto, hateten politika ne’e diak, maibe implementasaun mak lalos.
“Tanba politika ne’e dehan harii uma lima kada aleia, la’os harii iha kompleksu ida,” nia kestiona.
Tanba ne’e, nia konsidera implementasaun politika ne’e failha no gasta osan bo’ot deit maibe la fo benefisio ba iha povu kbi’it laek sira e benefisia fali kompania no ema sira ne’ebe iha kondisaun ona. “Lolos ne’e AND ne’e ba hatan iha tribunal,” nia hateten.