Sexta, Março 29, 2024
Total visitors: 766366

Reprezentante Banku Dezenvolvementu Asia (ADB), Allison Woodruff, hateten tinan ne’e (2015) ADB aloka orsamentu fundus atu selu espesialista estrangeirus hodi halo estudu kona ba problema lixu iha sidade Dili ne’ebe nunka rezolvidu.

Apoia ida ne’e, nia dehan, bazea ba asina Memorandum of Understanding (MoU) ne’ebe halo entre governu Timor-Leste ho ADB, governu husu ADB atu apoia halo estudu kona ba problema lixu iha sidade Dili hodi fo solusaun atu rezolve. 

“Governu Timor –Leste iha hanoin atu dezenvolve sidade Dili, hanesan fatin turismu nian entaun lixu ne’e ita tenke halo jestaun ne’ebe diak atu bele atrai turista sira,” Reprezentante ADB Woodruff iha Hotel Ramelau, Dili. 

Nia hatutan, lixu sai problema bo’ot ba nasaun dezenvolvidu sira seluk iha mundu, ne’ebe sai mos kauza principal ba moras sira ne’ebe afeta ba komunidade sira, tanba ne’e presiza halo jestaun ne’ebe diak ba lixu. 

Iha parte seluk, Diretor Jeral Ministerio Obras Publika (MOP), Joao Jeronimo, fo agradese ba ADB ne’ebe apoia ona halo estudu kona ba lixu iha sidade Dili, tanba bazeia ba estudu ne’e governu sei halo jestaun ne’ebe diak ba lixu. 

“Sira halo estudu ida ne’e hodi fo opsaun ba governu hodi deside,”Diretor Jeronimo hateten. 

Entretantu Xefe Departamentu Saneamentu Munisipio Dili, Domingos dos Santos, hateten tipu lixu iha Timor –Leste barak mak bele halo fali produsaun seluk hanesan dos, surat tahan, masa mamuk, botir no lixu matak sira ne’e bele halo adubu, ne’e lolos setor privado sira bele investe iha area ida ne’e.

“Ita nia nasaun sasan sira ne’e la folin, tanba ita seidauk iha kompania atu halo resiklajen sai osan no minimiza lixu,” nia hateten.  

Kompara ho nasaun seluk, nia dehan, Timor –Leste seidauk bele halo jestaun ne’ebe diak ba lixu, tanba seidauk iha setor privadu ruma mak investe iha area ida ne’e hanesan nasaun sira seluk.