Irigasaun Hat Iha Sesal Aat Hotu

Membru Parlamentu Nasional Deputada Ana Ribeiro, hateten kanalizasaun irigasaun hamutuk hat (irigasaun Kasameta, Sobabere, Ososege no Dareisi) iha Sesal, munisipiu Baucau aat hotu tanba abandonadu, tan ne’e husu ba governu atu hadia irigasaun hirak ne’e.

Tuir Deputada Ribeira, komunidade iha suku Sesal kuaze moris ho vida agrikultura, e durante ne’e komunidades hetan bee husi irigasaun hat ne’e fornese bee ba sira nia natar laran.

 “Irigasaun hirak ne’e aat hotu no abandonadu, no labele fornese bee ba komunidade nia natar,” Deputada Ribeiro informa, iha Parlamentu Nasional.

Nia hateten, irigasaun Sabobere fornese bee ba komunidade iha suku neen ( suku Buibau, Kaivaras, Buruma, Bahu, Samalari no  suku Sesal), maibe durante tinan lima ona suku neen ne’e la halo natar, tanba bee laiha.

“Povu iha suku neen ne’e la halo sira nia natar durante tinan lima ona,” nia hateten.

Nune’e mos irigasaun Dareisi, nia dehan, iha tinan kotuk governu halo bronjong ba irigasaun ne’e, maibe tanba halo la ho kualidade, entaun bee sa’e no estraga komunidade nia natar kuaze hektares 60.

“Udan mai sobu tia bronjong ne’e no sobu hotu komunidade nia natar,” nia dehan.

Enkuantu irigasaun Ososege, nia dehan, nia vocadora mak aat, tanba ne’e husu ba governu atu ba hadia, nune’e tinan oin komunidade bele halo natar.

Hatan ba kestaun ne’e Ministru Agrikultra e Pescas (MAP), Estanislau da Silva, rekonese kestaun hirak ne’e, e agora dadaun governu esforsu hela atu hadia buat sira ne’e.

“Balun ita halo hela, maibe balun seiduak , e presiza tempu atu rezolve kestaun sira ne’e hotu”  Ministru da Silva hateten.