- Publika iha: 05 Maio 2016
Implementasaun programa Seeds Of Life (SoL) durante tinan 16 iha Timor –Leste konsege estabelese grupos 1200 hodi produs fini komersial iha teritorio laran tomak.
Vise Ministru Agrikultura e Peskas (MAP), Marcos da Cruz, agradese ba apoia povu Australianu nian liu husi programa Seed of Life ne’ebe estabelese ona sistema fini nasional liu husi grupo produtor fini sira iha teritorio laran.
Nia rekonese, katak durante ne’e governu tau osan hodi importa fini mai husi nasaun seluk, maibe ho estabelesementu grupo sira ne’e, garantia 50% fini sei sosa deit iha rai laran.
“Ita estabelese ona Asosiasaun Produtores Fini no iha fini variedade 19 mak ita lansa ona, hau fiar 50% fini sira ne’ebe durante ne’e ita importa sei sosa deit iha rai laran,” Vise Ministrtu da Cruz garante, bainhira koalia iha Konferensia Timor Ag2016, iha Hotel Novu Turismo, Dili.
Nia hatutan, iha fini balun mak Timor sei menus (fore mungu, fore rai, fore kelu no seluk tan, maibe fini batar no haree barak ona e la presiza importa husi liur.
Kona ba projetu SoL ne’ebe sei remata iha fulan Setembru 2016, nia hateten, governu aloka orsamentu kuaze $2 miloens hodi dezenvolve programa ne’e ba oin, liu –liu halo peskiza atu bele iha fini ne’ebe kualidade.
Nia informa, kada tinan governu aloka $1 milaun resin hodi sosa fini husi rai liur hodi distribui ba iha agrikultor sira.
Iha fatin hanesan Team Leader Australia, Jhon Dalton, hateten iha progresu bo’ot durante tinan 16 nia laran, tanba konsege estabelese grupo produtor fini sira no estabelese mos sistema nasional fini iha Timor –Leste.
Nia dehan, durante tinan 16 sira mos fo ona formasaun ba ekipa MAP no parseiru sira inklui mos agrikultores kona ba dezenvolvementu fini.
“Halo peskiza no testu ba fini sira iha agrikultor sira nia to’os laran hodi identifika kualidade fini,” nia dehan.
Nia espera, fini sira ne’ebe iha sei fo mos rezultado produsaun ne’ebe diak no kualidade.
Entretantu Embaixador Australia ba Timor –Leste, Peter Doyle, kongratula ekipa hotu ne’ebe kontribui ba implementasaun programa Seed of Life, tanba iha progresu bo’ot.
Nia dehan, governu Australia hamutuk ho MAP sei dezenvolve fali programa foun naran “To’os ba Moris Diak” ne’ebe sei servisu diak liu tan hasa’e produsaun aihan alimentar iha komunidades.
“Programa foun ne’e sei mosu iha tempu badak ne’ebe sei dezenvolve bazeia mos ba produtor fini sira, tanba ne’e ita sei servisu hamutuk,” Embaixador Doyle hateten.