- Publika iha: 28 Outubro 2016
Membru Parlamentu (MP) Agustino Lay lamentavel, tanba sentru saude animal iha postu administrativu Fatumean, munisipiu Covalima laiha aimoruk hodi sona animal ne’ebe moras.
Nia hateten,tinan 2016 ne’e Parlamentu Nasional konsege aprova orsamentu lubuk ida hodi kompras aimoruk, maibe tanbasa sentru saude animal ne’e laiha aimoruk.
“Karau balun mate, tanba la hetan tratamentu,”MP Lay lamenta, iha Parlamentu Nasional.
Objetivu husi estabelesementu sentru ne’e, mak nia dehan atu halo vasinasaun no fo kurtivu animal sira ne’ebe mak moras.
Tanba ne’e, nia sujere ba Ministeriu Agrikultura e Peskas (MAP) atu kria linha koordenasaun ne’ebe diak entre xefe departamentu sira, hodi bele pasa informasaun ba malu ho lais.
“Fo atensaun ba ministru, kuandu monta ona tekniku iha ne’eba, tenke garantia funsionamentu sentru ne’e,” nia sujere.
Entretantu Xefe Departamentu Kontrolu Medikamentus Animais (MAP), Onofre Costa Henrique, rekonese kestaun ne’e, katak dadaun ne’e governu infrenta hela problema menus aimoruk.
“Medikamentus ne’ebe mak ami distribui ba kolega sira iha kampo talves la sufsiente, ne’e realidade ne’ebe mak ami hasoru,” nia hateten.
Nia informa, iha 2016 iha duni orsamentu hamutuk $99 mil hodi sosa aimoruk maibe osan ne’e la to’o.
“Aimoruk karun liu, depois osan ne’e la’os ba sosa deit aimoruk maibe sosa mos ekipamentus, entaun osanla to’o,” nia hateten.