Warsila to’o mai fin de Junu, konstrusaun sentral eletrika Betano seidauk hotu

Maske  desde fin de Junu Makina Wartsila to’o iha Timor maibe konstrusaun ba Sentral Eletrika Betano oras ne’e dadauk sei iha prosesu nia laran no seidauk atinji pursentu 50.

“Ne’ebe presiza tan tempu atu hadia, prepara kondisaun sira ne’e  wainhira jerador ne’e mai koloka iha ne’eba,” hateten Prezidente Komisaun G Parlamentar, Deputadu Pedro Martires da Costa, (05/06), iha Uma Fukun, Dili.

Nia dehan, maske konstrusaun ba fatin jerador ne’e seidauk remata maibe Governu sei prepara fatin provizoriu ruma atu tau makina sira ne’e.
Entertantu Delegasaun Parlamentu Nasional ne’ebe ba halo fiskalizasaun kona ba makina ne’e iha Italia, ,Deputadu Francisco de Araujo, dehan makina ho merek warsila 8 ne’e iha kualidade tanba foun hotu.

“Iha fulan kotuk ami duni to’o iha fatin ne’e buat hotu foun duni,reflete duni ba nesesidade povu nian,” hateten Deputadu de Araujo liu husi via telefone.

Deputadu ne’e katak, makina 8 ne’e oras ne’e dadauk aranka ona iha Italia no sei to’o iha Timor iha fin de Junu.

“Makina sira ne’e nia kapasidade 28 mega Watt tuir estandar, ne’ebe sei to’o mai durante fulan rua to’o ona iha Timor-Leste,” Deputadu de Araujo katak.