Negosiante merkadu Manleuana lamenta tanba modo sai dodok deit

Negosiante merkadu Manleuana lamenta tanba modo ne’ebe sira fa’an durante fulan ida resin ne’e ema ladun sosa no balun sai dodok deit.

“Ami fa’an besik fulan rua ona maibe ami nia sasan estraga mak barak liu tanba ema ladun mai iha fatin ne’e  atu sosa ami nia sasan,” lamenta Negosiante Natalino de Jesus, (11/06), iha Manleuana, Dili.
Negosiante de Jesus dehan, tan deit sasan la folin halo negosiante barak mak la fa’an ona iha fatin ne’eba no barak mak fila fali ona ba merkadu tuan Comoro.
“Agora ami balun deit mak fa’an iha ne’e balun konsege lori fila sira nia sasan ba uma no balun ba fali iha merkadu Comoro,”Negosiante de Jesus informa.

Enkuantu Deputadu Domingos da Costa dehan, fatin ne’eba diak ona maibe presiza kria kondisaun hanesan Estrada, nune’e kareta sir abele tama sai no ema bele sosa sira nia modo.

“Governu tenke loke estrada to’o iha ne’eba atu nune’e ema bele sosa sasan, se la’e negosiante sira nia sasan bele hetan dodok tiha deit,” sujere Deputadu da Costa.

Iha sorin  seluk Deputadu Mateus de Jesus katak, governu hatene muda negosiante sira maibe la kria kondisaun ne’ebe mak diak.

“Fatin ne’eba ne’e movimentu kareta tama araska entau sira kusta oituan atu ba hola sasan iha ne’eba,” dehan Deputadu de Jesus.

TDW tenta konfirma asuntu ne’e ba iha Administrador Distritu Dili, Gaspar Soares, maibe nia parte lakohi fo komentariu kona ba asuntu ne’e.