- Publika iha: 22 Fevereiro 2017
Governu (EDTL) monta ona prepago 10 000, iha postu administrative hat (Vemasse, Laga, Venilale no Baucau vila) iha munisipiu Baucau.
Xefe Departamentu Eletrisidade Demokratiku Timor-Leste ( EDTL) regional Baucau, Paulino Amaral da Costa, hateten monta prepago iha postu administrative Vemasse retama ona, Venilale foin 40%, Baucau 80% e Laga 50%.
“Komunidade barak mak hetan tiha ona, no total komunidade iha postu administrativu hat ne’e hamutuk 10 000 resin mak ami instala tiha ona” nia hateten.
Iha tempu badak, nia hateten governu mos sei monta tan prepago 6 000 resin iha postu administrative ne’ebe seiduak atinji 100% inklui sira balun ne’ebe mak seidauk.
Kona ba rendimentu, nia dehan iha tinan 2014 to’o 2015 konsege hatama osan ba kofre estadu masimu $35.000.
Nia mos kestiona, iha staff regional barak mak halo servisu dobradu tanba menus rekursu humanus, no situasaun ne’e fo impaktu ba produtividade servisu.
Tanba ne’e, nia husu ba governu sentral aumenta tan rekursu humanus hodi koloka iha regional.
“Alende fa’an iha kantor, pulsa ahi ne’e balun lori ba fa’an iha fatin seluk, e servisu ne’e dala ruma ema ida deit mak hala’o,” nia kestiona.
Iha parte seluk Membru Parlamentu (MP) Albina Marcal, konsidera ne’e progresu ne’ebe diak, maibe tenke haree mos ba kondisaun moris komunidade kbi’it la’ek sira.
“Tanba dalaruma sira atu ba sosa pulsa ahi nian, maibe sira osan laiha,” nia preokupa.
Tanba ne’e, nia husu ba governu atu tetu didiak no buka sistema ne’ebe diak, nune’e bele fo benefisiu mos ba komunidade kbi’it la’ek sira ne’e.