Domingo, Fevereiro 18, 2018
Total visitors: 196199

Diretor Nasional Asistensia Sosial (DNAS) Mateus da Silva hateten Ministeriu Solidaridade Sosial (MSS) to’o agora seiduak iha armajen ne’ebe adekuadu hodi tau
produtus ne’ebe sosa husi povu.

Diretor Nasional Asistensia Sosial MSS, Mateus da Silva hateten governu presiza kria kondisaun ne’ebe diak ba armajen sira hodi tau produtus ne’ebe sosa husi povu.

Nia hato’o kestaun ne’e liga ho programa governu nian ‘Povu Kuda Governu Sosa’ ne’ebe durante ne’e seidauk lao ho diak tanba falta kondisuan ne’ebe diak mos ba produtu hirak ne’ebe sosa.
“Ita seidauk iha armajen ne’ebe diak hodi tau produtus hanesan modo tahan, tomate no seluk tan antes fo ba maluk sira ne’ebe kbi’it la to’o,” nia hatete iha fatin, Dili.
Nia hateten MSS servisu hamutuk ho ministeriu relevante seluk liga ba politika no programa governu nian ‘Povu Kuda Governu Sosa’.
Nia hatutan katak MSS iha planu atu kria kondisaun armajen operasional ne’ebe sei hetan aprovasaun husi ministra MSS VII Governu Konstitusional Sra Florentina da Conceição Pereira Martins Smith.
Alende ne’e, sira mos tau matan hodi fo apoia fos, mina, masako, masin, ikan lata no supermi ba estudante sira ne’ebe hela iha asrama.
“Ami hakarak apoia mos modo tahan ruma ba eskola kolegio sira, maibe seidauk bele tanba tenke kria uluk armajen ne’ebe diak, nune’e lori ba tau iha fatin ne’ebe diak mos, sela’e ita estraga deit,” nia dehan.
Entretantu Manager Programa Organizasuan PERMATIL Estanislau Claudio Ximenes hateten produtu sira husi agrikultor ne’ebe governu sosa barak mak estraga deit tanba fatin la aproriadu.
“Liu-liu produtus kategoria modo tahan sira, ne’e labele rai to’o semana ga fulan, se ema la sosa loron rua hanesan ne’e soe estraga deit ona,” nia hateten.
Nia dehan, produtus barak liu mak estraga, hanesan modo no aifuan sira. “Kuandu ita laiha maneira ne’ebe apropriadu no diak ba fa’an nian, entaun ida ne’e sai
problema bo’ot ba produtu lokal,” nia hateten.
Iha parte seluk, negosiante Osorio Noronha sente triste tanba produtus ne’ebe nia fa’an iha merkadu ladun folin.
“Loron ida, hau hetan deit rendimentu $5, ida ne’e la sufsiente ba hau nia nesesidade lor-loron nian, ema ladun sosa tanba ita Timor gosta konsumu fali produtu mai husi liur,” nia deskontente.

E-mail Subscription

Enter your email address:

    Poll

    Nothing found!

    Follow us on Twitter