- Publika iha: 11 Julho 2012
“Sira ba tiha ona fa’an iha ne’eba maibe rai nain sira lakohi, mak sira fila-fali mai fa’an iha ne’e durante fulan ida ona,” hateten Negosiante Jenio de Jesus, (03/07), iha Pantai Kelapa, Dili.
Alende rai nain lakohi, ema ladun asesu ba iha fatin ne’eba no sira nia sasan la folin, tanba ne’e sira deside atu fa’an fali iha Pantai Kelapa.
Entertantu tuir Xefe Suku Fatuhada,Marcelino Soares katak, kondisaun fatin iha merkadu ne’e mak la favorese ba negosiante sira hodi fa’an sira nia sasan iha ne’eba.
“Kondisaun minimu horbainrua hau hateten ona, agora uma oan halo tiha ona, nahe tiha deit hanesan ne’e, agora ema nia sasan fa’an katupa,fa’an sate,tunu ikan sira ne’e tau iha ne’ebe,” hateten Xefe Suku ne’e.
Tanba ne’e, nia husu ba iha Governu kuandu atu muda Negosiante sira ba iha fatin ruma tenke kria uluk kondisaun, nune’e negosiante sira nia sasan labele hetan estragus.
“Peskiza de viabilidade, sira tenke identifika ema na’in hira mak fa’an sasan, fatin ema atu fa’an sasan ne’e rai estadu ga rai privadu ,” Xefe Suku katak.