- Publika iha: 10 Outubro 2017
Xefe Departamentu Seguransa Aihan no Informasaun husi Ministeriu Agrikultura no Peskas (MAP), Rofino soares Gusmao hateten munisipiu Baucau, Bobonaro, Covalima, Lautem, Oe-Cusse no Viqueque afetadu rai maran kauza husi El Nino ne’ebe akontese durante tinan rua tui-tuir malu iha rai laran.
Nia hateten, bazea ba peskiza rapidu ne’ebe sira halo ba setor agrikultura relasiona ho mudansa klimatika ne’ebe afeta maka’as ba iha produsuan aihan nian ne’ebe menus liu kompara ho tinan hirak ba kotuk.
“Ami halo peskiza iha munisipiu Oe-Cusse 88%, Baucau 79%, Bobonaro 72%, Covalima 60%, Lautem 58% no Viqueque 52%, rai maran dekor tanba afeta husi el nino,” nia hateten, iha Dili.
Nia rekonese, katak produsuan aihan ba tinan rua tui-tuir malu ne’e tuun kompara ho tinan hirak liu ba.
“Klaru ke produsuan ba tinan ida ne’e menus liu, hanesan hare, batar, aifuan sira inklui mos produsuan kafe tun liu e ida ne’e afeta ba rendimentu ba komunidade sira,” nia afirma.
“Ami servisu hamutuk ho ministeriu sira seluk, oinsa atu halo intervensaun hamutuk kona ba situasuan el nino iha Timor laran tomak.”
Nia informa, iha fatin balun El Nino ladun afeta ba iha produsaun aihan komunidade sira tanba sira hetan udan been diak, maibe iha fatin balun liu-liu ihamunisipiu neen ne’ebe temi iha leten ne’e desaraska.
Entretantu Xefe Suku Balibo Vila, Domingos Soares Assis rekonese katak komunidades menus aihan dunik tanba impaktu husi mudansa klimatika ne’ebe akontese iha rai laran.
“Tinan rua tui-tuir malu, rai manas tebes e fo impaktu ba iha komunidade sira nia aihan hanesan batar no foremungu hetok bee matan sira maran hotu,” nia hateten.
Kona ba bee moos, nia hateten komunidade sira tenke ba kuru bee iha mota no iha bee matan Salabin no Lulimatan ho distansia ne’ebe do’ok.
“Agora dadaun ami bee laiha, ami tenke ba kuru iha mota nomos ba bee matan Salabin no Lulimatan maibe la’o ain no dook husi hela fatin,” nia hateten.
Alende ne’e, nia dehan komunidade sira mos infrenta laiha fini, prepara hodi kuda bainhira udan monu rai.
“Agora, ami komesa prepara atu hahu halo fali to’os maibe fini laiha, ami tenke ba sosa fali iha Maliana ne’eba hodi ami bele kuda fali bainhira udan mai,” nia dehan.
Tanba ne’e, nia husu ba governu atu fahe netik fini ruma ba sira hodi sira kuda iha to’os ne’ebe sira prepara ona kuandu udan monu rai fali.
Iha sorin seluk Prezidente Komisaun D Parlamentar (ekonomia no dezenvolvementu), Deometrio Amaral de Carvalho hateten mudansa klimatika ne’ebe akontese iha Timor ne’e iha oin rua, mak El Nino no La Nino.
“Periodu ida El nino ne’e manas no ida La nino ne’e bokon liu, dalaruma ita haree el nino ne’e la mai entaun la nino ne’e mak mai, entaun ita tenke halo rezilensia ne’ebe forte tebes hodi hasoru situasuan ne’e, diversifika ai oan ne’ebe ita kuda, aihan sira no bee moos,” nia hateten.
Nia sujere, atu konserva tali hodi produs ba akar nune’e bainhira produsuan aihan sira hanesan batar, hare no aihan seluk menus, akar bele subtitui ou kuda talas ba fatin sira ne’ebe udan been barak liu.
“Tenke hili spesiais aihan hodi kuda tuir alternative klimatika nian, ida ne’e mak ita bolu rezilensia mudansa klimatika,” nia dehan.
Alende ne’e, nia mos husu ba komunidade sira atu labele tesi ai no sunu rai arbiru, liu-liu aihoris sira besik bee matan, nune’e bee matan sira labele maran bainhira bailoron naruk akontese.