Segunda, Fevereiro 19, 2018
Total visitors: 196285

Komunidade Fernando Mendonca husu ba governu foun mai (VII governu konstitusional) atu kria lei ida ne’ebe rigorozu hodi regula negosiante sira ne’ebe fa’an iha dalan ninin, hodi sira bele kumpri tuir lei ida ne’e.

Komunidade husu ba governu foun mai atu kria lei ne’ebe rigorozu hodi regula negosiantes ne’ebe kontinua fa’an sasan iha dalan ninin.

Tanba tuir nia, fa’an iha dalan ninin bele difikulta ba movimentasaun ema (la’o ain) no transporte publiku inklui privadu sira.
“Hau nudar komunidade, sujere ba governu foun ne’ebe sei mai, tenke kria lei ida ne’ebe rigorozu tebes ba negosiante sira hodi la’o tuir lei ne’ebe iha ona,” nia sujere, iha Dili.
Nia rekonese, katak negosiante sira fa’an iha dalan ninin tanba nesesidade moris mak obriga, maibe ida ne’e fo impaktu ba sira ne’ebe fa’an iha merkadu laran.
“Sira nia modo rai to’o dodok tanba ema la sosa no ema sosa deit modo sira iha dalan ninin,” nia kestiona.
Iha parte seluk negosiante merkadu Taibesi, Domingas Goncalves hateten merkadu ne’e luan liu no sasan la folin.
“Loron ida hetan $10 to’o $15 deit, balun uza bah an no balun ita fahe ba oan sira hodi sosa sira nia nesesidade eskola nian,” nia hateten.
Maibe, tuir nia, fa’an iha merkadu ne’e diak tanba tuur iha mahon no hakmatek, lahanesan iha dalan ibun, rai rahun suar bele kona fali ba modo.
Hatan ba kestaun ne’e, Xefe Departamento Gestaun Merkadu, Higiene, Orden Publiku no Guarda Munisipiu Dili, Berta Santa Goncalves Viera katak governu sei la tolera ba negosiante sira ne’ebe fa’an iha dalan ninin.
“Fatin fa’an mak iha merkadu Manleu no Taibesi, kuandu jestaun merkadu hetan sira fa’an iha trotoar leten, maka foti hotu sasan ne’e,” nia hateten.
Nia hateten, ekipa jestaun merkadu semana-semana halo kontrolu e la’os deit ba sira ne’e maibe ba mos loza sira iha Dili laran.
Kona ba operasaun ba ida ne’e, nia dehan negosiante sira hatene ona no bainihra ekipa tuun mak foti sira nia sasan, signifika katak sira labele fa’an iha fatin ne’e, tanba governu bandu ona.

E-mail Subscription

Enter your email address:

    Poll

    Nothing found!

    Follow us on Twitter