Sexta, Março 29, 2024
Total visitors: 766366

Xefe Suku Manleuana Jacob Ximenes Soares hateten membrus konselho suku hanesan delegada/o, reprezentante joventude feto no mane inklui lia nain sira la ativu iha suku hodi servi komunidade tanba sira laiha subsidio fiksu husi governu.

Diretora Ezekutivu Caucus (feto iha politika), Paula Corte Real hateten tuir lolos membru konselho suku sira ne’e mos iha direitu ba subsidio fiksu.

Nia dehan, iha inisio funsionamentu konseilho suku lao diak tebes, maibe ikus mai rona sira laiha subsidio entaun sira la besik sede suku.
“Barak la mai tanba sira hanoin ami mos povu mak hili hanesan mos xefe suku no xefe aldeia sira, maibe sira iha bensimentu fulan ami laiha,” nia hateten iha servisu fatin sede suku Manleuana.
Nia hatutan, hanesan lider komunitaria nafatin enkoraja sira atu halo servisu ruma iha suku laran, maibe kona ba subsidio ne’e kompetensia governu nian atu responde.
Nia hateten, iha membru balun mai tuir enkontru iha suku kada fulan tolu, maibe atu mai iha sede suku lorloron ne’e laiha.
Nia informa, sira mos lahatene papel lolos membru konselho suku sira ne’e nian tanba governu seidauk halo sosiaizasaun ida kona ba servisu saida mak sira presiza halo iha suku laran.
Entretantu, Diretora Ezekutivu Caucus (feto iha politika), Paula Corte Real hateten tuir lolos membru konselho suku sira ne’e mos iha direitu ba subsidio fiksu tanba sira mos liu husi prosesu elisaun komunidade vota ba sira.
“Sira la hatene sira nia funsaun lolos ne’e normal, tanba seidauk iha formasaun ida ba sira no lei do suku ne’e aprova iha fulan Julho no elisaun iha Otubro 2016 entaun seidauk iha sosializasaun ida klean kona ba sira nia knar,” nia hateten
Nia mos, hatutan iha lei do suku mos la hateten klaru kona ba membru konseilho suku sira nia papel, maibe sira ne’e legitimidade tuir lei.
Hatan ba kestaun ne’e Diretor Jeral Administrasaun Desentralizasaun Ministerio Administrasaun Estatal (MAE), Abilio Jose Caetano hateten iha lei ema ne’ebe iha direitu ba subsidio fiksu mak xefe suku, xefe aldeia no pesoal administrasaun.
Nia hatutan, ba membrus konselho suku sira seluk tuir lei sira simu $45 bainhira partisipa iha enkontru, maibe enkontru ne’e halao dala rua iha tinan ida.
“Governu foun iha ona hanoin atu fo subsidio ba membru konselho suku sira hanesan delegada/o, reprezentante joventude feto no mane inklui lia nain, maibe seidauk iha desizaun,” nia hateten.
Nia hateten, governu sei esforsu atu hadia konsidaun hotu hodi apoia membru konseilho suku sira nia servisu iha suku liu –liu prosesu dezenvolvimentu iha nivel baze.