- Publika iha: 17 Novembro 2017
Saude Munisipio Dili, hahu sosializa informasaun ba komunidade sira kona ba prevensaun moras dengue no fahe aimoruk abate ba iha uma kain risku sira hodi oho susuk tolun.
Delegada Saude Munisipio Dili, Agustinha da Costa Seguerado hateten intervensaun ne’ebe sira hahu halo hodi prevene moras sira iha tempu udan monu rai mak hanesan fahe informasaun ba komunidade sira atu halo limpeza no prepara aimoruk hodi responde ba iha kazu ruma bainhira mosu.
Nia dehan, meus sosalizasaun ne’ebe sira uza mak liu husi avizu sai tama bairo, media komunikasaun social sira no autoridade lokal sira atu informa ba komunidade sira atu halo limpeza iha uma ninin sira.
“Ita konvoka ona enkontru ho autoridade lokal sira, fo apoiu tomak halo limpeza jeral iha suku laran, fo mos formasaun ba iha pesoal saude sira, haree medikamentus disponivel ba iha fasilidade saude hotu,” nia hateten, iha Hotel Novu Turismo, Dili.
Kona ba aimoruk abate, nia dehan stok sufsiente atu halo distribuisaun no aimoruk fomigasaun inklui makina mos disponivel atu halo intervensaun bainhira kazu ruma mosu.
Alende ne’e, nia dehan sira mos halo ona intervensaun ba iha moras Malaria nian liu husi rega susuk no fahe muskateiru ba komunidade sira iha area risku hanesan Atauro.
Nia informa, tinan ida ne’e husi Janeiru to’o Otubru registu kazu dengue hamutuk 399 resin no husi numeru ne’e, nain rua mak mate tanba tarde lori ba fasilidade saude.
Entretantu, Diretora Servisu Autonomia Medikamentus e Ekipamentus Saude (SAMES), Odete Maria Freitas Belo hateten laiha aimoruk espesifiku ba iha moras dengue, maibe infus atu halo tratamentu ba iha moras dengue ne’e stok sufsiente.
Alende ne’e, nia dehan stok ba reajente moras dengue nian mos sufsiente, maibe moras dengue ne’e improtante liu mak halo prevensaun.
“Husu ba moras sira ne’ebe bele prevene, tenke esforsu halo prevensaun atu labele depende deit ba iha aimoruk.” nia hateten.
Nia hatutan, sira mos iha stok aimoruk oralit ne’ebe disponivel hodi responde ba iha moras diarea ne’ebe sempre registu maka’as bainhira tempu udan monu rai.