Asesor Cubano nain 5 ba programa analfabetizasaun fila hikas ba Cuba

Hafoin tinan rua ho balun ajuda populasaun Timor-Leste iha area Programa Analfabetizasaun, Asesor Cubano nain lima (5) tenke fila hikas ba Cuba, tanba sira nia misaun remata ona.

“Sira kontribui maka’as hanorin ita nia Timor oan rasik, hanorin ita nia inan aman sira atu hatene lee no hakerek,” hateten Diretor Ensino Recorente, Filomeno Lourdes dos Reis Belo, bainhara halo despedidade ho sira, (05/07), iha Vilaverde, Dili.
Diretor ne’e dehan, maske sira nain lima fila maibe balun sei iha ne’e, hodi kontinua programa analfabetizasaun, tanba distritu balun seidauk livre husi  analfabetu.

Entertantu Asesor Cubano , Henrique Roas Castro,  senti kontenti  tanba durante tinan hira ihaTimor-Leste no bele ajuda povu iha area analfabetu.

“Sertifikadu ne’ebe hau simu ne’e ba hau nia domin e sertifikadu ne’e hau sei lori ba hau nia rai, hau sei hatudu ba hau nia oan nain rua iha Cuba no mos sei hatudu ba nasaun Cuba,” dehan Asesor ne’e ho kontente.

Asesor Castro rasik durante tinan rua ho balun hanorin iha Distritu Viqueque ho programa analfabetizsaun.

Iha fatin hanesan Asesor Cubano seluk , Antonio Galiano mos  senti kontenti iha Timor-Leste, tanba implementasaun kampanha Analfabetizasaun ba Povu Timor  e barak mak hatene lee no hakerek ona.

“Durante ne’eami iha relasaun diak iha Suku no Aldeia sira ba implementasau programa ne’e,” dehan Asesor ne’e.