FHF Estabelese Asosiasaun Imprestimu Iha Suku

Fundasaun Feto Hadomi Familia (FHF) ho apoiu husi doadores, konsege organiza grupos feto iha suku hodi estabelese asosiasaun imprestimu hanesan mikrokreditu ki’ik hodi fo imprestimu ba grupo feto sira halo atividade negosio ki’ik.

Diretora FHF, Martinha da Silva hateten organizasaun feto barak mak servisu iha area empoderamentu feto, maibe area kobertura lahanesan no mekanismu apoiu ne’ebe diferente tanba sira la fo fundus, fundus mai husi grupo rasik.
Nia dehan, ba programa imprestimu ne’e sira fo apoiu tekniku deit hanesan fo formasaun jestaun negosio no oinsa jere osan imprestimu nian.
Nia informa, sira konsege estabelese grupo imprestimu hamutuk 42 iha munisipio Aileu no Ainaro liu –liu Maubisse, maibe iha Aileu gurpo 25 no grupo 6 iha Maubisse mak susesu.
“Iha grupo balun ne’ebe iha ona osan rasik, no sira bele fo ona imprestimu ba ema seluk no sira fahe ona osan funan,” nia hateten iha servisu fatin Becora, Dili.
Nia hateten, rendimentu ba feto sira iha mudansa bo’ot tanba feto barak mak involve iha grupo hortikultura atu kuda modo ho kuantidade ne’ebe barak atu bele distribui ba iha supermerkadu sira, laos deit ona bah an.
Tanba ne’e, nia husu ba governu atu identifika fatin potensial sira atu kria sentru feto hodi bele fo formasaun ba feto sira atu bele explora potensialidade ne’ebe iha suku laran hodi hetan rendimentu sustenta sira nia familia.
Iha parte seluk, Diretora organizasaun Movimentu Feto Foinsa’e Yasina Lujina hateten sira mos iha programa hakbi’it ekonomia feto liu husi fo formasaun no apoiu fundus ki’ik ba grupo feto sira halo negosio.
Nia dehan, kondisaun iha area rural la fasilita no tulun feto sira hodi dezenvolve sira nia aan liu –liu atu iha rendimentu lor-loron tanba sira susar atu asesu ba iha merkadu.
“Esforsu balun governu halo hanesan programa povu kuda governu sosa, maibe programa sira ne’e laiha sustentabilidade tanba governu foun, ema foun tama muda politika hotu,” nia hateten
Ho kondisaun sira ne’e, feto sira barak halo atividade agrikultura, maibe nafatin hela iha situasaun kbi’it la’ek tanba produtu laiha folin atu ajuda dezenvolve sira nia moris.