Alola Halo Peskiza Ba Kor Natural Tais Timor Nian

Fundasaun Alola (FA) halo ona peskiza ba kor natural tais Timor nian kada munisipios no elabora ona ba livru, ne’ebe sei lansa iha tempu badak hodi fasilita grupo produtor tais sira uza.

Diretora FA, Alzira Reis hateten Timor –Leste tenke prezerva produtu origin sira ne’ebe sai hanesan identidade Timor nian tanba ho era globalizasaun no teknologia ne’ebe avansadu produtu sira ne’e ameasadu lakon.
Nia dehan, governu halo ona esforsu bo’ot atu registu tais Timor iha UNESCO hanesan identidade Timor nian, maibe iha buat barak mak governu presiza halo atu prezerva produto kultural sira ne’e.
“Governu tenke halo lei intelectual property right atu protese no motiva mos intelektual sira ne’ebe hamosu kor no motif (modelu) sira ne’ebe iha,” nia hateten
Nia hateten, lei ne’e importante tebes atu rekonese inan feto sira ne’ebe maske analfabetu, maibe sira intelektual no abilidade hamosu motif oi-oin.
Nia informa, iha grupo produtor tais original hamutuk 50 iha munisipiu sira, ne’ebe durante ne’e hetan apoia tekniku no formasaun husi Fundasaun Alola.
Nia hateten, apoia ne’ebe sira fo durante ne’e mak kria merkadu ba grupo produtores liu husi feira Natal no Paskua ne’ebe halo kada tinan, harii loja hodi tau produtu grupo sira nian no fasilita Grupo sira partisipa iha feira internasional sira iha Santa Fe no Australia.
Iha parte seluk, Koordenadora Grupo Moris Dame Maria da Costa Cabral hateten merkadu mak sai problema ba sira, tanba laiha merkadu ida permanente ba sira atu fa’an sira nia produtu.
Atu soru tais ho kabas no kor original ne’e, nia dehan presiza tempu tanba tenke foti ai tahan, ai kulit no seluk tan tein kor, maibe folin mos diak kompara ho uza material fabrika.
“Ami hein deit feira, bainhira iha feira ruma ami tenke partisipa tanba husi ne’e mak ami bele hetan rendimentu,” nia hateten.
Nia hateten, rendimentu ne’ebe sira hetan ajuda supporta familia liu –liu oan nia eskola, harii uma no responde ba nesesidade lor-loron nian.