MED: uza mini merkadu iha Bidau ba interese privadu

Mini merkadu ne’ebe mak Ministeriu Ekonomia no Dezenvolvimentu (MED) halo iha Bidau Santana, nune’e komunidade sira  fa’an sira nia ikan, maibe realidade akontese ministeriu uza fali ba interese privadu aluga fatin ne’e hodi simu ikan mai husi rai liur.

“Agora nia mak aluga tomak uma ne’eba ne’e halo nia privadu fali,” hateten Xefe Suku Bidau Santana, Francisco de Asis Freitas, iha Bidau, Dili.
Mini merkadu ne’e halo husi projeitu Pakote Referendum (PR) e to’o agora seidauk entrega obras ne’e ba komunidade sira iha fatin ne’e, maibe derepente Ministru tau tiha jelera iha fatin ne’e.
“Ikan mai husi liur ne’e senhor ne’e mak simu maibe ofer ba iha ne’ebe-ne’ebe deit hau la hatene,” dehan Xefe Suku ne’e.

Entertantu Sekurity iha Mini merkadu ne’e, Apolinario Rodrigues dehan, fatin ne’e fa’an ikan nian, maibe komunidade sira lakohi fa’an iha ne’e e sira hakarak fa’an iha dalan ibun deit.
“Iha ne’e so ami mak fa’an maibe fa’an iha sorin ne’e deit, sorin la fa’an husik hela deit,” dehan Sekurity ne’e.

Iha sorin seluk  Vendedor ikan Luis da Silva, katak  durante ne’e sira la fa’an sira nia ikan iha fatin ne’e tanba seidauk hetan autorizasaun husi governu.

“Iha ne’eba ami rona ema ida deit mak fa’an ikan, mais la hatene se mak fo autorizasaun ba nia mak nia ba fa’an,” dehan Vendedor  da Silva.

Vendedor ikan sira pronto atu fa’an ikan iha fatin ne’e bainhira hetan ona autorizasaun husi Ministeriu kompetente.