Governu Aloka $4.7 Miloens Ba STAE

Governu aloka orsamentu $4.7 miloens ba Sektretariado Tekniku Administrasaun Eleitoral (STAE) hodi prepara ba iha logistika no operational ba realizasaun elisaun antisipada iha fulan Maio tinan ne’e.

Ministru Administrasaun Estatal, Valentin Ximenes hateten governu halo esforsu tomak hodi halo ajustamentu ba orsamentu atu finansia prosesu tomak ba elisaun antisipada mai.
Nia dehan, orsamentu montante ida ne’e ba deit iha servisu tekniku nian, la inklui orsamentu Comisaun Nasional Elisaun no Defeza Seguransa nian.
“Ita sei aumenta sentru barak e aumenta mos kustu, tanba reprezentante CNE no STAE sei hela iha estrangeirus durante fulan tomak,” nia hateten iha salaun STAE Kaikoli, Dili.
Nia hateten, elisaun tinan ida ne’e sei hala’o mos iha nasuan Australia, Portugal, Inglatera, Irlandia Norte no Korea do Sul, tanba Timor oan barak mak hela iha rai hirak ne’e.
Portantu ba Timor oan ne’ebe hela iha nasaun vizinho Indonesia, nia dehan seidauk bele halo resensiamentu eleitoral tanba kestaun politika no naturalizasaun, maibe se sira hakarak vota, sira bele mai tuir votasaun depois mak sira ba fali hodi kontinua sira nia estudus.
Iha parte seluk, Diretor Jeral STAE Acilino Manuel Branco hateten sira iha tempu ne’ebe sufsiente atu kompleta material logistika sira tanba material balun hanesan urna, kabina votu ne’ebe uza iha elisaun tinan kotuk sei presiza kompleta numeru balun tan no halo akizasaun foun ba iha material eskritorio no tinta.
Alende ne’e, nia dehan sira mos halo tiha ona rekrutamentu ba iha official eleitoral no birgada sira no iha tempu badak sei fo formasaun hodi fasilita servisu sira iha sentru votasaun sira.
“Pre –prepasaun ne’e maximu ona e iha tempu badak sei publika kalendario operasaun elisaun nian, depois publikasaun data elisaun iha jornal da republika hodi ita la’o tuir kalendario ne’ebe iha,” nia hateten.
Nia dehan, servisu resensiamentu eleitoral no aktualizasaun dadus la’o hela iha postu administrative sira hotu no sei termina iha loron 28 fulan Marsu, no iha loron 12 fulan Abril STAE halo publikasaun ba numeru eleitoral fiksu tuir lei haruka loron 30 antes elisaun.
“Husu autoridade local sira atu fasilita mos deklarasaun ba iha komunidade ne’ebe hakarak halo aktualizasaun ba sira nia kartaun, liu –liu muda hela fatin,” nia husu.
Nia hateten, elisaun tinan ida ne’e eleitor sira nafatin vota tuir sira nia suku ne’ebe registu ba, tanba ne’e sira ne’ebe hakarak vota iha Dili oportunidade atu muda sira nia hela fatin.