Karau Iha SPA Dotik Mate 10, Tanba Laiha Aimoruk

Karaun iha Sentru Produsaun Animal (SPA) ne’ebe mak Governu liu husi Ministeriu Agrikultura e Peska (MAP) kria iha Dotik, Alas, Distritu Manufahi, foin dadauk mate barak, tanba falta de aimoruk hodi halo vasinasaun ba animal sira ne’e.

Asistente sentru produsaun Dotik, Agostino da Silva hato’o lia hirak ne’e katak, animal hanesan karau tinan ne’e mate kuaze 10 resin.
“Tinan ne’e karau kuaze 10 resin mak mate, foin lalais mak ita iha Doutor iha ne’e, iha planu atu sosa aimoruk maibe osan mak laiha,” hateten Agostinho da Silva, Asistente SPA, foin lalais iha Dotik.

Animal hirak ne’ebe hakiak iha SPA ne’e mak hanesan karau, bibi no manu. Karau hamutuk 38, bibi 45, manu lokal 200, maibe agora tun tanba makikit han, manu Garuda han, samea no laho mos han tanba aistente sira uma dok mak la dun tau matan ba animal sira ne’e.

Tanba ne’e sujere ba Governu atu halo uma ba staf sira ne’ebe hein animal besik iha Sentru ne’e.
“Hau hato’o be-beik ona maibe laiha resposta husi governu,” Asistente da Silva tenik.

Entretantu Deputadu Adriano Joao, ne’ebe hanesan eis membru Komisaun D Parlamentar iha II lejislatura, dehan parlamentu seidauk bele halo buat ida tanba seidauk kria komisaun.

“Iha terseira lejislatura ne’e ami seidauk tama iha komisaun, komisaun ami sei forma iha semana ida ne’e nia laran,” Deputadu ne’e dehan.

Tuir nia, ida ne’e kompetensia husi Komisaun D nian atu halo fiskalizasaun ba fatin ne’eba, nune’e bele hatene tuir kauza animal sira mate ne’e.