- Publika iha: 28 Janeiro 2014
Prezidente Grupu Trabalho Defisientes Timor-Leste (GTD), Joaquin Soares, lamenta ho obra ponte Comoro II ne’ebe uza orsamentu bo’ot, maibe susar ba ema defisiente sira atu asesu, tanba fatin atu uja kadeira roda no aitonka laiha. 
Ho realidade ida ne’e, nia rekonese, katak durante ne’e ema defisientes seidauk goza sira nia direitu ho diak, sei iha diskriminasaun barak iha area hotu.
Area hirak ne’e mak hanesan saude, edukasaun, servisus inklui mos infrastruktura, tanba maioria fatin publiku sira iha rai laran hanesan ospital, igreja, eskola, edifisio publiku susar ba ema ho defisiente asesu ba.
“Ami koalia ida ne’e laos atu husu kria ponte ketak ida, bele kria asesibilidade fisiku ne’ebe diak atu defisiente sira labele hela deit iha uma maibe sira bele asesu ba eskola, treinamentu no servisu,” Prezidente GTD, Soares, hafoin partisipa iha selebrasaun loron mundial ba defisiente, iha Sentru Konvensaun, Dili.
Nia hatutan, tinan ida ne’e importante tebes atu bolu atensaun ba ema hotu liu –liu governu atu iha seriadade ba asuntu ema ho defisiente, tanba sira mos iha direitu hanesan ho ema seluk.
Iha okaziaun ne’e grupo defisiente sira mos husu ba goveru atu adopta regulamentu universal ba dezenvolvementu infrastruktura iha futuru nune’e bele iha regulamentu ba konstrusaun atu obra sira ne’e bele sensivel ba ma ho defisiente mos.
Iha fatin hanesan Vise Primeiru Ministru, Fernando Lasama de Araújo telephone kedas ba iha Ministru Obras Publikas, Gastão de Sousa no ministru rasik rekonese failansu ida ne’e, tanba dezenho obra ne’e la involve defisiente sira.
“Hau aproveita tempu telephone ba ministru obras publikas no nia rasik rekuinese katak ne’e falta ida mak governu komete katak ponte la konsidera ema ho defisiente sira,” nia dehan.
Lasama mos promete sei promove nafatin pensamentu ida ne’e, katak edifisio publikus hanesan hotel, ospital, estradas no seluk tan tenke asesibel tanba iha konstituisaun RDTL ema ho defisiente tenke hetan tratamentu hanesan ho ema kondisaun normal.