Sexta, Março 29, 2024
Total visitors: 766366

Ministru Saude, Sergio da Costa Lobo, hateten desde ukun an to’o agora komunidades iha sukus 219 mak seidauk asesu ba asistensia saude, tanba seidauk koloka pesoal saude iha suku hirak ne’e.

Tanba ne’e, Ministru Lobo, dehan tinan ne’e ministeriu sei koloka tan medikus iha suku hirak ne’ebe seidauk iha pesoal saude no agora iha ona prosesu rekrutamentu.

“Iha fulan Maiu ne’e sei iha graduasaun medikus foun no agora halo hela rekrutamentu ba pesoal foun, hau hein katak antes fin do ano it abele koloka ona iha suku hirak ne’e,” Ministru Lobo hateten, iha Parlamentu Nasional.

Iha parte seluk, Mateus Pinto, hanesan komunidade ida ne’ebe durante ne’e hela iha area izoladu, hateten sira tenke la’o ho distansia ne’ebe do’ok hodi asesu ba fasilidade saude.

“Ami tenke la’o klilomentru hitu resin foin to’o iha postu saude hodi hetan tratamentu saude,” Pinto kestiona.

Nia dehan, durante ne’e inan isin rua sira partus deit iha uma akompanha husi daia (bidan kampung) ne’ebe esperiensia, tanba postu saude do’ok  no laiha transporte.

“Ami kuandu moras, ami toba iha uma deit no konsume aimoruk tradisional sira ne’ebe bele kura ami nia moras,” nia hateten.

Entretantu Deputado Eladio Faculto, husu ba Ministeriu Saude atu buka alternative hodi sirkula ba sukus ne’ebe seidauk iha postu saude.

“Tanba 219 sukus ne’e la’os numeru ne’ebe ki’ik, karik iha fatin ne’ebe izoladu liu, hau hanoin tenke iha duni klinika mobile ida atu halo mobilizasaun to’o fatin sira ne’e,” Deputado Faculto sujere.

Nia hatutan, postu saude sira ne’ebe instala ona iha sukus balun mos sei iha problemas oioin hanesan laiha transporte, falta aimoruk no ekipamentus medikus seluk tan.