- Publika iha: 16 Junho 2014
Komunidade aldeia Dauala, suku Fahirai, distritu Aileu desde tinan 2002 to’o agora seidauk asesu ba bee moos.
Xefe suku Fahirai, Luis Nemao, hateten durante ne’e komunidade sira consume deit bee mota hodi uja ba tein, haris no fase roupa.
Iha tinan 2002, nia dehan, organizasaun Care Internasional dada bee tama ba aldeia ne’e, maibe la kleur deit at fali no to’o agora seidauk hadia.
“Aldeia ne’e iha leten liu, sira consume bee mota no dala ruma sira tun ho distansia ne’ebe dok atu kuru bee iha kraik,” Xefe Suku Fahirai, Luis Nemao hateten, iha Aileu.
Kona ba kestaun ne’e, nia hateten, nia parte hatama ona proposta ba Sekretariadu Estadu Agua e Saneamentu (SEAS), maibe to’o agora laiha rezultadu.
“Proposta hatama bebeik ona, maibe laiha mudansa,” Nemao dehan.
Hatan ba preokupasaun ne’e Ministeriu Obras Publiku (MOP), Gastao de Sousa, hateten kona ba bee moos, agora dadaun ministeriu halo hela estudu viabilidade kona ba jestaun bee moos iha Dili laran lai.
“Ita haree bee ne’e barak, maibe tanba sa mak la to’o ba populasaun sira,” Ministru de Sousa hateten.
Kuandu estudu viabilidade ne’e hatudu rezultadu diak, nia dehan, mak sei implementa mos iha distritu seluk to’o sukus no aldeias.