- Publika iha: 11 Novembro 2014
Ministerio Justisa ho Parlamentu Nasional iha ona komitmentu atu halo alterasaun ba Kodigu Penal (KP), liu –liu haforsa artigu balun hodi kriminaliza aktu insestu.
Vise Ministru Justisa, Ivo Jorge Valente, rekonese katak iha kodigu penal seidauk difini lolos kontestu insestu, maibe iha artigu sira ne’ebe iha kriminaliza mos aktu insestu ne’e rasik hanesan iha artigu 171,172,173 kodigu penal maibe presiza haforsa liu tan.
“Ita koalia kona ba konseitamentu (hakarak ho hakarak), hau aseita katak bele halo alterasaun ba kodigu penal,” Vise Ministru Valente hateten, bainhira halo enseramentu ba seminario nasional prevensaun insestu iha Timor–Leste, iha salaun Ministerio Solidaridade Sisial, Vila Verde, Dili.
Tanba ne’e nia husu nafatin sosiedade sivil sira no orgaun kompetente sira seluk, atu nafatin fo hanoin no opiniaun bele haforsa lei sira ne’ebe iha hodi kombate aktu ida ne’e iha rai laran.
Iha parte seluk, Deputada Josefa Alvares Pereira Soares, hateten parlamentu iha ona komitmentu atu halo alterasaun ba kodigu penal, tanba iha artigu balun fo limitasaun atu proteje labarik sira.
Prezidente Grupu Feto Parlamentar ne’e, hateten tenke fo atensaun seriu ba problema insestu ne’ebe buras dadaun iha rai laran, tanba ida ne’e bele estraga dezenvolvementu futuru nasaun nian.
“Ami iha ona komitmentu atu halo alterasaun, maibe ita presiza rona mos hanoin husi instituisaun relevante sira atu ita halo alterasaun ba artigu sira iha kokdigu penal ne’e,” Deputada Soares hateten.
Entretantu Diretor Ezekutivu Judicial System Monitoring Programme (JSMP), Luis de Oliveira Sampaio, konkorda atu halo alterasaun no kria artikel ida iha artigu hirak ne’ebe iha ona.
“La’os halo fali lei foun, maibe artikel ida iha artigu hirak ne’ebe eziste ona, katak konsientementu la debate iha kazu insestu,” Diretor JSMP Sampaio hateten.
“Tanba la logika, aman nudar protector ba familia halo fali violasaun hasoru oan,”.
Se la halo alterasaun, nia dehan, ne’e fo fatin ba tribunal sira atu konsidera nafatin konsientementu bele absolve kazu, tanba realidade durante ne’e kazu insestu barak mak absolve, ho razaun hakarak ho hakarak.