SED Lansa Livru Kona ba Estratejia Forsa Rejistensia 1975-1999 Nian

Sekretariadu Estadu Defesa (SED) halo lansamentu ba livru kona ba forsa rejistensia nian husi tinan   1975-1999 nian, e iha livru ne’e hakerek historiku kona ba pratika estratejia no  sofrimentu Forsas Armadas nian.

Komandante Jeral Falintil Forsa Defeza Timor-Leste (F-FDTL), Xefe Estadu Maior Jeneral Lere Anan Timor, hateten livru ne’e koalia liu kona ba forsa armadas  nian, kona ba pratika estratejia sofrimentu no inisiativa  ne’ebe  mak Indonezia halo.

Tuir nia, katak molok atu hakerek livru ne’e, sira konvida ema Portugues nain tolu, military nain tolu, sira mai  tuur hamutuk ho Prezidente da Republika Taur Matan Ruak (TMR) hodi fo ideias ba malu mak foin hakerek livru ne’e.

“Hau hanoin livru ne’e hakerek la kompletu, maibe sufsiente atu eduka leitor sira, tanba historia iha laran ne’e la’os ema nia ideias, maibe  bazea ba realidade  pratika, ami labele  inventa,” Jeneral Lere Anan Timor hateten, iha Palasiu Governu.

“Karik hau oho ema nain sanulu, entaun hau dehan hau oho ema,”.

Atu hakerek livru ida kona ba historia, nia dehan, presiza estuda barak kona ba historia Timor nian e la’os deit F-FDTL mak hakerek, ema hotu bele.

Iha fatin hanesan Ministru Edukasaun, Bendito Freitas, hateten livru ne’e hakerek historia Timor  kona ba forsa armadas sira nian , ne’ebe mak uluk luta ba rejistensia iha okupasaun Indonezia.

Tanba ne’e, tuir nia, lansamentu  livru   ba forsa armada ne’e importante tebes, tanba sai  hanesan dokumentus historiku ba jerasaun foun sira.

“Livru ne’e importante ba ita nia nasaun, tanba produsaun de livru  sai hanesan instrumento  referensia literatura historika no valor nasionalismu ba jerasaun foun,” Ministru Freitas hateten.

Ministru hateten, siklu livru ne’e importante tebes ba sidadaun, liu-liu ba edukasaun atu bele deskobre diak liu tan ba valor nasionalismu  historiku, ba pais  soberania hanesan   independente.

Nia hatutan, historia Timor  tenke hakerek hanesan forsa  defeza no forsa armadas nian, tenke tau iha  livru  liu-liu ba publiku sai hanesan referensia literaria bo’ot, ba ema hotu-hotu ne’ebe luta  ba Timor, ao mesmu tempu ba area edukasaun iha parte fakuldade historia nian.