Domingo, Fevereiro 18, 2018
Total visitors: 196199

Adjuntu Provedoria dos Direitus Humanus (PDHJ), Silverio Baptista Pinto, husu ba sosiedade tomak liu liu familia atu respeitu ema ho moras mental nia direitu hodi labele viola.

Nia parte hato'o kestaun ne'e tanba realidade sei iha deskriminasaun barak hasouru ema ho moras mental, liu-liu husi familia sira.

“Atu minimiza ida ne’e, ita husu ba komunidade no familia sira ne’ebe iha moras mental tenke respeita sira, tau sira nia direitu no dignidade hanesan mos membru familia sira seluk, labele diskrimina tan,”  Adjuntu PDHJ Pinto sujere, bainhira partisipa iha serimonia komemorasaun loron mundial moras mental ne’ebe organiza husi  PRADET, iha Dili. 

Nia hatutan, ba futuru estado tenke kria ona lei espesifiku ruma atu regula ema sira ne’ebe halo diskriminasaun no violensia hasoru ema ho moras mental, tanba ne’e kestaun ne’ebe immoral. 

Nia espera iha loron importante ida ne’e bele bolu atensaun ba sosiedade tomak atu fo atensaun ne’ebe maximu ba ema ho moras mental promove sira nia direitu no fo protesaun ba sira. 

Iha fatin hanesan, Direitor Ezekutivu organizasaun Rekoperasaun Psikososial no Dezenvolvimentu Iha Timor Lorosa’e (PRADET), Manuel Soares, hateten ema ho moras mental la'os deit hetan diskriminasaun, maibe violasaun husi ema normal sira tanba sira vulneravel liu. 

“Tuir ami nia dadus iha distritu rua Liquisa no Baucau iha inan feto nain rua ho kondisaun moras mental hetan violasaun husi mane normal sira,”nia hateten. 

Nia hatutan, situasaun ida ne’e sai preokupasaun bo’ot PRADET nian, tanba la'os deit iha distritu rua ne’e maibe iha area rural sira seluk ne’ebe seidauk identifika. 

Nia mos informa, katak PRADET nafatin halo sosializasaun ba komunidade no familia sira atu hasa’e sira nia konsiensia hodi fo protesaun ne’ebe diak ba ema ho moras mental ne’ebe moris iha sira nia le'et. 

Entretantu Maria da Silva nudar komunidade, hateten edukasaun moral ba sosiedade importante tebes atu hasa’e sira nia konsensia hodi respeitu mos ema ho moras mental nia direitu tanba sira mos iha direitu atu moris iha pas no harmonia nia laran. 

“Kazu hanesan ne’e barak akontese liu –liu iha area remotas maibe seidauk relata ho diak,” nia dehan.

E-mail Subscription

Enter your email address:

    Poll

    Nothing found!

    Follow us on Twitter